Shillong Risaw 03: U Bah Disparsing Rani hynne ka sngi, ula pynpaw iaka jingbynniaw halor ka jingbym lah ban shna pyndep iaka jingtei ha Lum Sohpetbneng kaba kot 18 klur tam bad watla kala don ka jingkam ba ia katei ka projek la pyndep haduh 94% iaka jingtrei.
“Kala don ka jingkam jong ka Meghalaya Tourism Development Corporation (MTDC) ba ia katei ka projek la dep ban shna ia kiba bun ki jingtei ia kaba la kot sha ka 94% hynrei ha ka jingjurip ka jong nga, la shem ba ka jingshna ia katei ka projek ka dang long hapoh jong ka 80% namar bun ki jingtei ym pat lah ban pyndep haduh mynta” ong u Bah Disparsing Rani.
U Bah Rani ula ong, ia katei ka projek la bei tyngka da ka sorkar pdeng lyngba ka Swadesh Darshan Scheme kaba kot T.18.82 klur bad ia kane ka projek la sdang naduh u bnai Rymphang 2019 bad la ia por ban shna pyndep hapoh 18 bnai hynrei haduh mynta bun ki jingtei ym pat lah ban shna pyndep.
“Ka pisa kaba la mang bun eh kadei ka Sound and Light Show kaba kot T.6 Klur 54 Lak tam, hynrei kine kim shym la don satia ha Lum Sohpetbneng bad kane kadei kaei kaei kaba sngewlyngngoh bad kaba sngewsynei iaka Seng Khasi bad ha ka jingshisha kane ka skhim kadei kaba ai jingiarap pisa na ka bynta kito ki briew kiba don jaka hynrei ngam lah ban mutdur kumno ka Seng Khasi ka leit ai haka MTDC ban tei iaka projek hangto bad kadei kaei kaei kaba lyngngoh” ong u Bah Disparsing.
Ula ong katkum ka jingiateh kular, ka Seng Khasi kadei ban ai iaka Completion Certificate ynda la pyndep ia ka kam, hynrei ka jingkylli kaba mih ka long ka jah shano kata ka T.6 Klur bad ka Seng Khasi kadei ban wad bad ka MTDC kadei ban ai iaka jingpynshai.
“Nga kyntu iaka Seng Khasi ba kam dei ban ai iaka Completion Certificate namar ka tang shu ai, kan paw ba ka Seng Khasi ruh ka donktilang namar ym shim la iohi ban don ia kitei ki tiar ki tar kiba kot T.6 Klur tam” ong u Bah Rani.
Ula ong, kam shim la don ka jingshna bha bad katei ka jaka kadei kaba kyntang bad ki kontraktor kidei ban pyrkhat na ka bynta ka jingbit jingbiang bad jingdon burom jongka jaka kyntang ha Lum Sohpetbneng.
U Bah Rani ula ong kam shim la don ka Landscaping, Solid Waste Management bad kiwei kiwei namar ha ka jingkhmih ka jongu la shem ba na ki 22 tylli ki jingtei ki bym don ki long haduh 10 ne 11 tylli.
