Shillong, K’Lyngkot 30: U myntri ka tnat Arts and Culture u ba dei ruh u nongialam ka Bharatiya Janata Party (BJP) bah Sanbor Shullai hynne ka sngi ula ong ba udei uwei na ki MLA ka BJP ban iasaid haba don kano kano ka jingshah thombor ki riew ngeit Kristan hapoh ka ri India.
Haba kren sha ki lad pathai khubor u bah Sanbor ula ong ba kam bha ban wanrah iaki jingshah thombor ki riew ngeit Kristan ha kiwei ki jylla ka ri India ban pynlong mat iakhun ilekshon hapoh Meghalaya.
U bah Sanbor haka jingialam u Myntri Rangbahduh ka ri Narendra Modi ka ri, ka la kiew bah ba bun ki liang bad kiwei ki Party ruh kim dei ban pynlong mat iakhun ilekshon na ki katto katne ki jingjia kiba la jia ha kiwei ki ri India.
“Ha man ki ilekshon kiwei ki Party ki kren pynshoi beit ba ka BJP ka pyrshah ne ka ibein iaki riewngeit Kristan hynrei wat ha ki jaka nongkyndong ruh ki paidbah ruh kim kwah shuh ban ioh sngew iaka jingkren pyrshah iaka BJP namar kila sngewthuh ba dei tang ka BJP kaba lah ban wan ka sorkar kaba bha naka bynta baroh” la ong u bah Sanbor.
U bah Sanbor ula ong ba ka roi ka par ka kiewi bha haka jingialang ka BJP bad kumba 71 tylli tam ki skhim la dep ban pyntreikam ha Meghalaya naka bynta ka jingmyntoi ki paidbah ka Meghalaya.
Ula ong ba ki paidbah mynta ka kynti kidei ban stad noh bad kidei ban bud nuksa na kiwei ki jylla ban ai jingkyrshan noh iaka BJP namar dei tang ka sorkar BJP ka ba lah ban wanrah ki kam pynroi ne ki lad ioh kam ioh jam iaki samla.
“Haduh 98% ki paidbah ha Nagaland kidei ki riewngeit Kristan hynrei ki ai jingkyrshan iaka BJP bad ki ioh iaki kam pynroi kiba myntoi naka bynta ki paidbah bad kane ka jingkynnoh ba ka BJP ka lehbein bad ka ibein Kristan kadei hi tangt ka jingkynnoh da kiwei ki Party tang ban pyntieng iaki paidbah haka por ilekshon” la ong u bah Sanbor.
