Shillong, K’lyngkot 23: Ka Sohra District Demand Forum (SDDF) ka pynpaw ia ka jingsngewdiaw kaba khraw halor ka jingpynslem jong ka Sorkar MDA hapoh ka jingialam u Chief Minister Conrad K. Sangma ban pynbna (notify) ia ka jingkyntiew kyrdan ia ka Sohra Civil Sub-Division sha ka Distrik ba pura.
U Chairman ka SDDF Bah Atiar Syiemlieh ula pyn paw ba ka SDDF ka la dep iakynduh ia u Myntri Rangbah ha ka 26 tarik Risaw 2022 ha kaba ula kular ban khmih bniah ia kane ka jingdawa jong ki paidbah ka thain Sohra baroh kawei.
Ha ka taiew kaba nyngkong jong u Kyllalyngkot (January), 2023 u Myntri Rangbah ula phah khubor lyngba u dkhot ka SDDF u Bah Alan West Kharkongor ba u kwah ban iakynduh ia ki dkhot ka Forum ha ka 5 tarik Kyllalyngkot (January), 2023 ban pynbna (declare) noh ia ka Sohra Civil Sub-Division kum ka Distrik ba pura.Ka Forum da ka jingkmen wut wut ka la lum ia ki khlieh nongsynshar bad ki Rangbah Shnong jong ka thain ban pyntip ia kane ka khubor bakmen.
Hynrei phewse ha ka jingiakynduh kaba la long ha ka 5 tarik Kyllalyngkot 2023 ha Sohra Circuit House, u Myntri Rangbah u la pynjew slew ia ki dkhot ka Forum bad ia ki khlieh nongsynshar da kaba u shu kular ban sa ai District bad ba ka Sohra kan dei ka headquarter, hynrei lano kata kan urlong, um shym la jubab ne kren thikna.
Ka SDDF kala pynpaw ba kane ka jingkular u Myntri Rangbah ha ka jingialang kam shim iahap satia katkum ka jingphah khubor jongu sha ka Forum ban pynbna District noh ia ka Sohra Civil Sub-Division, hynrei ka shu long pynban tang ka jingkular lehse tang namar ba ka Assembly Election ka la jan.
“Namar ba ki la don ki khubor ka khlieng ka tyngab kiba ialam bakla, kumta ka SDDF ka pynpaw shai kdar ba haduh mynta ka Sohra Civil Sub-Division kam pat kiew kyrdan District satia bad ka SDDF kan iai bteng ia kane ka jingdawa haduh ba kan da urlong” la pynpaw u Bah Syiemlieh.
Ka SDDF ka kyntu ruh ia ki seng sainhima sima ba kim dei ban ialam bakla ia u paidbah ka thain Sohra halor kane ka kam tang ban ioh jingmyntoi election.
