Shillong, Naitung 12 : Ka Khasi Student Union ka la pynpaw ka jingbynñiaw hadien ba ka ïoh jingtip bad ioh ka jingujor na ki phew ngut ki samla Khasi kiba kamai da kaba kit passenger da ki thuk thuk lyngba ki app kiba pher bapher kum ka Rapido halor ka jingkhang noh ka tnad Transport ia kine ki app ba treikam hapoh u pud u sam ka jylla Meghalaya.
Halor kane na ka liang ka seng ka pynpaw ka jingsngewkhia shikatdei eh hadien ba la ioh ia katei ka jingujor ha kaba la sngewthuh ba da ki spah ngut ki samla ki duh noh ia la ka jong ka jakpoh.
Ha kajuh ka por ka KSU ka sngewthuh ruh ba ka jingkhang jong ka tnad Transport ka lah ban dei ha ki nongrim kiba ia dei bad ki aiñ ki kanun ka jylla.
Kumta lyngba ka kyrwoh ka seng ka kyntu jur ia ka tnad Transport ban wad lad wad lynti ban pynioh lad ia kine ki samla ban kamai biang lyngba ki thuk thuk katkum ki kyndon aiñ ka tnad.
“Kum ban shu ai nuksa, ka jylla Mizoram ha u snem 2017 ka la ai permit ia ki thuk thuk ban kamai kit passenger ha kylleng ka nongbah Aizawl lyngba ka Two-Wheelers Taxi Service. Shuh shuh ruh hadien, ka tnad Transport ka Mizoram ka la seng la ka jong ka online app kaba la tip kum ka Huiva kaba ia syriem bad ki apps kum ka Rapido, Ola, Uber bad kiwei kiwei.
Kane ka app ka dei kaba treikam beit thik tang ha Mizoram bad la pyniaid ia kane ka app la leh hi da ka sorkar Mizoram na ka bynta ka jingmyntoi ki nongkamai thuk thuk bad ki paidbah. Kumta ka seng ka sngew ba kumba leh ha Mizoram, ka Meghalaya ruh ka dei ban shim kum kine ki sienjam kaba long ka lad ai kam ia ki samla wad kam wad jam ha baroh ki bynta,” ong ka kyrwoh ba la phah da u general secretary ka seng samla Donald V Thabah ha ka kyrwoh.
Ka seng ka pynpaw ruh ka jingkyrmen ba ka sorkar kum ka kmie kan peit lem bad iarap ban weng ia ki jingeh ba kitei ki nongñiah thuk thuk ki ia kynduh lyngba ka jingkhang ia kitei ki app ba nabar.
