Shillong, Naiwieng 30 : Ka kynhun kiengatiar Hynniewtrep National Liberation Council (HNLC) hynne ka sngi Balang, kala pynpaw ia ka jingbynniaw ia ka jingshah khot hajir ki Nongialam ha ka National Investigation Aganecy (NIA) namar ba ka jingiakren iasuk kala sdang hapdeng ka Sorkar bad ka kynhun.
Kane kala mih hadien ba u Special Judge ka NIA, ula phah ia ka notice ba khor hajir ia ki Nongialam ka HNLC.
Ka HNLC kala pynpaw ba kane ka jingkhot hajir ka dei ka bym sngew iahap satia namar ba ka Kynhun kala wan sha ka miej iakren iasuk.
“Kane ka dei ka dak ba ki bor khmih kila iaid palat ia u pud jong ki kyndon iakren iasuk” ong u General Secrretary ka HNLC bad Publicity Secretary Bah Sainkupar Nongtraw ha ka kyrwoh.
Ula ong ba hashuwa ka jingpynkhreh ia ka jingiakren iasuk bad ka Sorkar India bad Sorkar Jylla, ka HNLC kala kren shai ba dei ban weng noh ia baroh ki case ban pynthikna ia ka jinglong shngain khnang ban lah ban pyntyllun shakhmat ia ka jingiakren iasuk.
Ula kam ruh baka Sorkar kala kular ba shisien baka jingiakren kala sdang, baroh ki case barim kim dei shuh ki jingkhuslai bad ba kin ym pynthut shuh ia ka jingiakren iasuk.
“Ha ka jingshisha u Myntri Rangbah Conrad K Sangma ha ryngkat u Myntri kam Pohiing ma Lahkmen Rymbui, kila pynpaw b aka chargesheet jong ka NIA kan ym ktah satia ia ka jingiakren iasuk” ula ong haba buh jingkylli “Ka jingkhot hajir ka dei ka jingsngewkhia namar haba ka jingiakren kala iaid hynrei kumno ba dang pynngat case thymmai ia ki nongialam”.
Haba pynpaw ba kane hi ka pyni shai ia ka jinglong arsap jong ka Sorkar, kaba lah pynkha ia ka jing artatien bad jingbym shaniah ia kane ka jingiakren, u Bah Sainkupar ula ong baka HNLC kala sangeh ia ki kam pynriem namar kane ka jingiakren iasuk bad haduh mynta ka Seng kam shym la leh ia kano kano ka kam ka ban pynthut ia ka jingiakren iasuk.
“Ngi la shong bunsien ki jingialang bad ki Heh jong ka MHA lem bad ka Sorkar Jylla. Haduh mynta la kular ha ngi ia ka jingiasuk ba pura, ka jingiatreilang da ka Sorkar hynrei ka jingkhot hajir mynta ka dei dei ka bym iahap satia” ula ong.
