Nongstoin, Jylliew 6: Ka seng FKJGP-West Khasi Hills, kala pynpaw ia ka jingbynniaw kaba jur hadien jingioh jingtip ba ka Tnad Sports ha District, kala pynkylla ia ka lympung ialehkai Subroto Cup na ka league sha ka knock out.
Ka seng kala pyntip ba ki khynnah ialehkai ba ki skul kila khnium bha ia kane ka jingpynkylla, kaba la leh dang mynta u snem ia kaba barabor la ju pynlong da ka league system.
Ka seng hapoh ka jingialam u Sports Secretary ka seng Bah Anthony Umiong, ka la leit ban ai da ka jingthoh sha ka DSO ba dawa ban pynlong beit ia kane ka lympung da ka league system bad pan jingpynshai, balei la shu pynkylla kyndit kumne.
La pyntip ba na ka liang ka DSO kala iathuh ba ka daw hi ka dei namar bala khim palat ka por ba kin phah ia ka Champion team ban mihkhmat ia ka District sha ka State Level.
La iathuh ba ka DSO kala kular ruh ba kan sa lum kyrkieh ia ka Tournament Committee ban shong pyrkhat halor kane ka jingdawa ka seng.
Kat kum ka jingong ka FKJGP, ka jingpynkylla ia kane ka lympung kan ktah bha ia kane ka jingialehkai bad khamtam eh ia ki khynnah ialehkai ki ban duh ka lad ka kabu ban pyni ia ka sap kaba ki don da ka jingioh ban ialehkai bunsien ha ka lympung.
Ka seng ka pynpaw ba ia mynta u snem lehse yn ym lah ban leh eiei shuh hynrei ka dawa ba ha ki snem ban wan, ka Ophis ka DSO ka dei ban pynialehkai beit ia kane ka lympung da ka league system.
