Shillong, Nailur 26: Ka DHS Dr FV Kharshiing hynne ka sngi ka pynpaw ka jingsngewsih halor ka jingshim ki paidbah hala ki jong ki kti ban khang iaka jaka sumar, namar kane ka ktah hi iaki paidbah kiba donkam bun ki lad jingsumar.
Lah ban kdew ba haka 20 tarik mynta u bnai, ki paidbah kila khang iaka Jongksha Community Health Centre (CHC) daka ba kynnoh ba ym don Doctor ha kane ka jaka sumar.
Ka Dr Kharshiing kala pynshai ba ki Doctor ki don iala ka hok ban shim shuti daka ba ong “Iwei i la shim shuti kham mynshaw bad iwei Doctor i shim shuti namar ka koit ka khiah”.
Ka la ong ba ki 2 ngut ki Doctor hashuwa ban shim shuti kila pyntip sha ki bor District bad ki bor District ruh lyngba ka ophis DMHO kila pynbeit da iwei Doctor na East Jaintia Hills i ba trei ha Pynursla.
“I Doctor ba dei wan shimti iaka Jongksha CHC, i la wan naduh Pynursla bad naki daw bym lah kiar hala ka iing, i la pynbeit ban wan noh sha CHC haka 21 tarik Nailur bad ine i Doctor i la pyntip ruh shaka Ophis DMHO hynrei ka long kaba sngewsih baka jingkhang ki paidbah iaka CHC, kala pynpulom ia i ban wan sha kane ka jaka sumar” ong ka Dr Kharshiing.
Ka Dr Kharshiing kala pynshai ba watla, ki 2 ngut ki Doctor kim don, ka Ophis DMHO kala buh iwei Doctor Ayush bad ka don ruh ka Tele-consultation ban iarap ia i Doctor.
Kala ong baka Ophis DMHO haka 20 tarik Nailur kala phah ruh da uwei Doctor na Mawiong ban iarap ia i Doctor Ayush ha CHC hynrei ka long kaei kaei kaba sngewsih, ba u Doctor u shah beh pynban haki nong shong shnong.
Haba pynrem iaka jingkhang iaka jaka sumar, ka DHS kala ong “Ki dawai khamtam ki injection ki donkam ban buh haki Deep Freezer bad donkam ban eksamin naka por shaka por, bad step bad miet hynrei lada khang tala sah ia kane ka CHC, ka mut iaki dawai baroh hap bret noh”.
“Kane ka jingkhang iaka CHC lane ia kino kino ki jaka sumar ka long ka jingduh kaba khraw bha iaki nong shong shnong. Lada ngi shim hala ki jong ki kti ban shu khang iaki jaka sumar, ka long kaei kaei kaba sngewsih bad ka long ka jingduh kaba khraw iaki nong shong shnong” kala ong.
