Shillong, Jylliew 17: Ka seng ‘Bri Hynniewtrep Exporter and Importer Association (BHE&IA) kala kynnoh ba ka jingpynkiew dor ia ka bai shalan maw na ka T.2200 sha ka T.4000 kala wanrah ka jingeh iaki nongkhaïï maw ha ka bri hynniewtrep.
Haba kren sha ki lad pathai khubor u President ka ‘Bri Hynniewtrep Exporter and Importer Association u bah Nikistar Nongrang ula iathuh ba ka ophis SDO jong ka Pynursla Civil Sub Division kala ai jingbit ban pynkiewdor ia ka bai shallan maw na ka T.2200 sha ka T.4000 naka bynta 5 ton u maw ban khaii sha Bangladesh.
U bah Nikistar ula ong, ba ka ophis SDO kala pynmih ia katei ka jingai jingbit ha ka 29 tarik Jymmang 2023 bad mar ia mih katei ka hukum kiew dor kynsan ka shallan maw.
“Kum ka seng ki nongkhaii kala iakynduh ia ka SDO ha ka 10 tarik mynta u bnai ia kren ia kane ka jingeh ba kiba bun kim ioh ia ka slip quarry ban thied maw, ha katei ka jingiakren kim pyrshah ia kata ka jingai ia ka slip kwari hynrei kaei kaba ki pyrshah ka long ba ia ka slip kwari la ai tang sha kiba ki kwah” la ong u bah Nikstar.
U bah Nikstar ula ong, ba kaei kaba jia ka long ba kito kiba don ia ka slip quarry ki ai tang ia kaba ki mon, kane ka paw ba don kiba ioh ban kit maw man ka sngi, katba don kiba ioh tang ar ne lai sien ha ka shibnai, ka jingkwah jongki ka long ba dei ban ai lang solansar ia baroh kane ka slip kwari.
Ha ka jingshisha ban phah ia u maw sha Bangladesh don kam tang ia ka shalan bala ai na ka ophis jong ka DMR bad ka LC kaba la ia da u Importer na Bangladesh, hynrei hapdeng kata la mih bun ki slip, kum ka COVID Slip, Parking Slip, bad mynta sa ka slip kwari kaba kim lah shuh ban sngewthuh.
Pule lang ia kane: Sdang ka Tur Shaphrang Football Knockout Tournament
