Shillong, Naiwieng 08 : U Lat ka Jylla CH Vijayashankar ha ka sngi Thohdieng, ula pynpaw ia ka jingsngewkhia halor ka jinglong jingman hapoh ka North Eastern Hill University (NEHU) namar ka jingiashah thngan ba dang iaid jong ki sama pule, kaba lam ruh sha ka jingpoi hospital kiba bun ki samla pule.
Ka Univeristy kala poi sha ka jingkhang dam hadien ka jingiakhih jong ki samla pule hapoh ka lama jong ka North Eastern Hill University Students Union (NEHUSU) bad ba kyrshan da ka KSU-NEHU Unit ha kine ki 4 sngi bala leit noh, kum ka dak ban pyrshah ia ka jingmynthi u Vice Chancellor Prof PS Shukla ban weng kam ia u Registrar bad Deputy Registrar.
Ha ka jingiakynduh bad ka kynhun ki Nonghikai kiba dei ki nongialam na ka NEHUTA bad MeTTA ha Raj Bhavan, u Lat ula pynpaw ia ka jingsngewkhia hadien ba pule ia ka jingshah thngain jong ki samla pule ka NEHI, kaba la lam sha ka jingioh pang ki lai ngut ki samla.
Ula kylli pyrthew bha ia ka jinglong jingman na ka NEHUTA bad ula iakren sani bha ruh halor ki jingeh jong ki samla pule bad kumjuh jong ki Nonghikai bad ki Non Teaching Staff.
Hadien ka jingshah skhor bha ia ki kynrum kynram ha NEHU bala pynsngew da ka NEHUTA bad MeTTA-NEHU, u Lat ula kyrpad ia kine ki seng ba kin pynithuh ia ki jingeh bad tyrwa ia ki lad ki lynti ban pynbeit ia shipor bad ba neh shirta.
Ula kyntu ia ki ba kin phah da ka jingthoh kaba batai bniah bha, khnang ba un lah ban shim ia ki sienjam ba donkam ban shim.
U Lat ula kular ruh ia ka jingthmu ban pynbeit ia ka jingiakren bad ki kynhun bapher bapher kynthup ia u Vice Chancellor bad ki bor Sorkar, ban pynbeit ia ki kam kat kum ki jingkongsan jong ki.
U Lat ula kyrpad ruh ia ka jingiarap jong ka NEHUTA ban pynpoi ia ka khubor na u sha ki samla pule haba kyrpad ia ki ba kin weng noh ia ka jingshah thngan. Ula kular ia ki ba un sa shim ia ki sienjam kiba donkam, haba pynpaw ruh ia ka jingsngewkhia halor ka koit ka khiah ki samla.
Kum u Chief Rector ka NEHU, u Lat ula kular ba un sa ai ia baroh ki jingkyrshan kiba donkam ha kaban lah pynbeit noh kham kloi ia ki kynrum kynram bad ban pynneh ia ka nam ka burom jong kane ka skulbah.
 bad ba kyrshan da ka KSU-NEHU Unit ha kine ki 4 sngi bala leit noh, kum ka dak ban pyrshah ia ka jingmynthi u Vice Chancellor Prof PS Shukla ban weng kam ia u Registrar bad Deputy Registrar.){kind=link}