Tura, Rymphang 17: Ka Dorbar Mang Tyngka jong ka Garo Hills Autonomous District Council (GHADC) kan sdang ha ka taiew ban wan, ha kaba ki nongtrei jong ka Council kila byrngem ban pynlong iaka jingsangeh treikam halor ka jing bym siew ia ka tulop kaba la sahteng la bun bnai.
Ki nongtrei hapoh ka lama jong ka Non-Gazetted Employees Association, kila byrngem ban sangeh treikam naduh ka taiew ban wan hynrei kila pynjynsur noh ia kane namar ba ka Council kan long ia ka Dorbar Mang Tyngka ha ka sngi Nyngkong kaba long kaba kongsan bha na ka bynta ban bhah tyngka ia ki tnad bapher bapher.
Kine ki nongtrei ki don ia ka jingthmu ban ap haduh ban da kut ka Dorbar Mang Tyngka hashwa ba kin shim ia kano kano ka sienjam ban pynlong ia ka jingiakhih.
Kane ka jingthmu ban pynlong iaka jingiakhih kala pynmih ruh iaka thma ktien hapdeng ka Executive Committee (EC) kaba ialam iaka GHADC da ka seng NPP bad ki nongialam jong ka NGEA kiba kynnoh ba ki bor pyniaid jong ka Council kam shym la bat iala ka kular ban siew pyndep noh iaka tulop kaba sahteng.
“Ka Employee Association kam shym la wan iakynduh ia ngi ne ban ai ktien eiei ba kan pynlong ia ka jingiakhih. Kam shym la don kano kano ka jingai jingtip ne jingai jingthoh ne ka jingthmu ban shong jingialang ban iakren halor kane ka mat. Ngi la ioh jingtip ia kajingthmu ka jongki lyngba ki tyllong khubor” ong u CEM ka GHADC u Albinush R Marak.
Kane ka jingpynsahteng ban siew iaka tulop kala iai bteng naduh ki snem kiba la leit bad mynta ka pisa kaban siew kum ka tulop na ka bynta ki spah ngut ki nongtrei kala nang heh shuh shuh.
Ki nongtrei ka GHADC kila mad jingeh halor ka jingbym ioh ka jong ki iaka tulop la 32 bnai bad ka tulop kaba khatduh kaba kila ioh kadei ha u bnai Nohprah jong u snem bala dep kata hashwa ka jingrakhe iaka Kristmas bad kila ioh tang 2 bnai ka tulop.
Ki nongtrei kila dap da ka jingbynniaw bad kila kam ba na ka liang jong ka EC kala kular ban ai sa 2 bnai ka tulop ha u bnai Kyllalyngkot mynta u snem.
“Kam don jingmut ban iakynduh iaka EC ban iakren halor ka tulop namar ba kila dep ban ai ia ka jingkular ban ai iaka tulop ha u Kyllalyngkot hynrei kila pynkhein noh ia la ka jingkular” ong u Nongtrei uba la bitar.
Katba u CEM ka GHADC u Albinush Marak ula ong, ba kam long satia kumtei kumba la kynnoh.
“Ngi la ai beit ia ka jingkular, kata man ba ka sorkar jylla ka ai iaka jingkyrshan bad ai iaka pisa, ngin pyllait noh iaka tulop. Mynta ka kynti ruh, ngi la khmih lynti ba ka sorkar jylla kan ai jingkyrshan khnang ba ngin lah ban iarap ia ki nongtrei, khamtam haba ki skul bad ki kolej kila plie ba kadei ka por kaba ka pisa ka long kaba donkam bha” ong u CEM.
“Ngi don ia ka jingthmu ban iakynduh bad ban pynsngew ha u Myntri Rangbah ka jylla u Conrad K Sangma ynda u wan sha Tura, ia kaba la khmih lynti mynta ka taiew” la pyntip u CEM bad ka ong, ba kan long kaba eh shibun ia uno uno u briew ban siew pyndep lut iaka tulop jong ki nongtrei kaba long kaba heh bha, mar ia shimti ia ka kam.
“Naduh ka por ba ka EC jong ngi kala shimti ban pyniaid ia ka Council, ngi la dep ban siew pyndep lut iaka tulop kaba sah, ha ka jingshisha ngi la dep ban siew ruh iaka tulop kaba 34 bnai watla ka jingshimti ka jong ngi ka dang long ha ka por kaba lyngkot bha. Katei ka jingsiew pyndep iaka tulop ka kynthup ruh iaka tulop kaba sahteng naduh ka por jong u CEM uba nyngkong eh u Benedict Marak namar udei uba khliehduh ia kane kaajuh ka EC,” ong u Albinush Marak.
“Ka pisa kaba sahteng ban siew kadei ka tulop kaba 30 bnai bad kadei kaba la pynsahteng da ki EC kiba rim jong ka GHADC. Ngi mynta ngin hap ban pynkhuid lut ha kaban siew lut ia katei ka tulop” ong u Marak bad ka bynniaw artad.
