Shillong, K’lyngkot 17: Haba pynpaw pyrthei ia ki jingeh kiba dei ki daw bah ba mad ha ka liang ka pule puthi, u Commissioner & Secretary ka jylla u Vijay Mantri hynne ka sngi Thohdieng ula ong ba ka jingdon ki skul ha ka jylla kala long kaba la bun palat haba ianujor bad ka jingdon jong ki briew.
“Nuksa, watla ka jylla Tripura ka don bun bah ki nongshong shnong hynrei ka jingdon ki skul pat ka long tang kawei na ka lai bynta (one third) ia kaba ka Meghalaya ka don skul.
Ka Manipur ruh kaba don mar kumjuh hi ka jingbun ki nongshong shnong, ka don 4,617 tylli ki skul. Nalor kane, ka Meghalaya ka don ruh bun bah ki ki skul kiba ioh jingkyrshan ne Aided School, katba kiwei pat ki jylla ki don tang khyndiat bha. Ha ka ri hi, ki Aided School ka long tang hapoh ka 5% jong ka jingdon ia ki skul baroh, hynrei ha Meghalaya ka long haduh 29%,” ula ong.
Une u Ophisar ula bynrap “Haba ianujor, ka Kerala, kaba don ia ki nongshong shnong kaba kot 3.34 Klur (Census 2011), kaba long shiphew shah ia ka Meghalaya, ka iaryngkat bad ka Meghalaya ha ka jingdon ia ki skul kaba kot haduh 15,864 tylli (Tyllong: Ministry of Education, Govt. of India, 2023-24). Kumjuh ruh ka Himachal Pradesh, kaba don ia ki riat ki ram kiba eh bha ka don 17,826 tylli ki skul ban ai jingshakri ia ki 68.64 lak ki nongshong shnong”.
“Ka jingbun palat jong ki skul ha Meghalaya ka la pynlong ban duna jong ki khynnah, ha kaba bun tylli ki skul kila pyntip ia ka jingduna jong ki khynnah pule, kynthup wat ia kito ki bym don wat uwei ruh u khynnah ne tang katto katne ngut ki khynnah” ula bynrap.
Ula pyntip ba ki don haduh 206 tylli ki skul ki bym don ki khynnah skul bad haduh 2269 tylli ki skul kiba don ia ki khynnah tang hapoh ka shiphew ngut kaba kynthup ia ki 18 tylli ki Deficit bad Adhoc School ki bym don khynnah pule bad 1141 tylli ki skul kiba don hapoh ka 10 ngut ki khynnah, katba ha ka SSA ki don 30 tylli ki skul ki bym don khynnah pule bad 268 tylli ki skul kiba don tang hapoh 10 ngut ki khynnah bad ha ki skul sorkar pat ki don 11 tylli ki skul ki bym don khynnah pule bad 132 tylli ki skul kiba don ia ki khynnah tang hapoh jong ka 10 ngut.
U Mantri ula kdew ruh ba kawei na ki daw jong ka jingdon bun palat ki skul ka dei namar ba ia kajuh ka skul la kum khein bunsien ha ki jinglum jingtip (Data). Kane ka jia haba ki skul shimet ki pan bun tylli ki Grant na ka sorkar. Nuksa, ka skul kaba kyrteng ka skul XYZ ka lah ban shah khein kum 4 tylli ki skul, watla kadei kaba la longtrai bad pyniaid da kawei ka kynhun, kumba la kdew harum.
