Bujli ka Sorkar ia ka bor pyntreikam ia ka SBMGP na ka PHE sha ka Tnad C&RD

Shillong, K’lyngkot 30: Ka sorkar jylla kala shim ia ka rai ban pynkynriah noh ia ka bor ban pyntreikam ia ka Swachh Bharat Mission Gramin Plus (SBMGP) na ka tnad Public Health Engineering (PHE) sha ka tnad Community and Rural Development (C&RD).

Ia kane ka rai la mynjur da ka Kynhun Myntri hapoh ka jingialam jong u Myntri Rangbah ka jylla Conrad K Sangma hynne ka sngi Palei.

Haba iakren bad ki nongthoh khubor, u Conrad Sangma ula ong, “Namar ki jingeh kiba la mad da ka tnad PHE namar ba ka dei ruh kaba pyntreikam ia ka Jal Jeevan Mission bad namar ka jingduna haka jingdon ki nongtrei ban pyntreikam ia ka SBMGP, la shim ia ka rai hynne ka sngi da ka Kynhun Myntri ban pynkynriah noh ia ka bor ban pyntreikam ia ka SBMGP na ka tnad PHE sha ka tnad C&RD”.

Haba kdew ba kila don 3 tylli ki daw ba la shim ia katei ka rai, u Myntri Rangbah ula ong “Kawei kadei ba ka tnad C&RD ka don ia ki nongtrei ha ki shnong ki thaw ban pyntreikam ia katei ka projek. Ka baar, kiba bun na ki jylla ha ka ri kila leh kumtei mynta na ka bynta katei ka daw ba ka tnad C&RD jong ki sorkar jylla bapher kaba don ia ki kor bad ia ki nongtrei ban pyntreikam ia ka SBMGP ha ka lynti kaba kloi bad kaba biang bha. Ka ba lai, ha ka jingialang kaba dang shu dep bad ka Jal Shakti Ministry, u Myntri Sorkar, u Secretary bad ki heh ophisar kila ai jingmut ia ka sorkar Meghalaya ruh ban pynkynriah noh ia ka jingpyntreikam na ka PHE sha ka tnad C&RD.”