Shillong, K’lyngkot 30 : U Myntri ka Tnad Revenue & Excise Bah Kyrmen Shylla ha ka sngi Ba-ar, ula pyntip ba ka Tnad Revenue kala wad ia ki lad ki lynti ban tehlakam noh ia ka jinglait ei ka khajna khamtam ha ka kam khaii kyaid.
Kane ka lad ka lynti ka kynthup ia ka jingpyntreikam noh da ki kor Computer ban buh jingthoh ia ka jinglum khajna na ka kam iadie iathied kyaid, ula bynrap.
U Bah Kyrmen u ong ba ia mynta hi ym don satia kano kano ka jingthoh ba kdew ia ka jinglait ei ka khajna haba bynrap “Ka jingpyntreikam noh da ki kor Computer ban buh jingthoh bad jingkhein, kan ailad ia ngi ban tip lada don ka jinglait ei ka khajna nalor kan ai ia ka jingkhein kaba shai halor ka jingioh lum khajna”.
Watla kane ka sienjam ka dei kaba dang thmu bad ba donkam ia ka jingmynjur ka Kynhun Myntri, u Bah Kyrmen ula kdew ia ka jingdonkam ia ka jingiarap song pisa bad lad aka wan khlem kano kano ka jingeh, ka jingpyntreikam ia kane ka sienjam kan long kaba iaid beit iaid ryntih.
“Ka thong jong ngi manla ka snem mang tyngka ka long ban kyntiew ia ka jingiohlum khajna” ula ong.
Haba kylli halor ka rai jong ka Sorkar ban ithuh noh da ka ain ia ka wine ba shna hi, ula ong ba kane ka dei ka sienjam kaba biang palat bad kala iarap bha ruh ia kiba bun ki nongshna wine hapoh ka Jylla.
Ula ong “ Ngin pyrshang ban pynurlong lada donkam ia ka jingkyrshan. Ka thong jong ngi ka long ban long ka nongshalan wine ba heh duh hapoh India. Ka Sorkar kan ailad katba mon ia ki briew kiba kwah ban shna wine…naka liang jong ngi, ngi lah ba ai sha ki da ka licence bad ki kot ki sla ba donkam”.
