Shillong, Lber 19: U Myntri Kam Pohïing ka jylla Bah Prestone Tynsong ula buhthong ba un ialeh kat kaba lah ban pynbha ia ka tnad Meghalaya Police bad ban pynlong ruh ia kane ka Tnad kaba khuid kaba suba ka ban yn ym don kino kino ki kam jyrsieh.
Katei ka jingkren u Bah Prestone ka dei hadien ba kala don ka jingkynnoh na ka liang u AIG barim ka jylla Bah Gabriel Iangrai uba la kynnoh ba ki don bun bah ki kam jyrsieh ha ka tnad pulit jong ka jylla.
“Mar ia shimti kum u Myntri ka tnad kam pohiing, nga la lum iaka jingialang bad ki heh pulit ka jylla ban sngewthuh bad ban tip kham bniah iaka jinglong jingman jong ka tnad pulit” ula ong.
“Nga la iohi iaka jingkren jong u Bah Gabriel Iangrai, uba la kynnoh ba ki don bun bah ki jyrsieh ha ka tnad pulit, hynrei kum u Myntri Sorkar nga pynthikna ia ki paidbah ba lada ki don shisha kum kita, ngan ialeh ban pynkhuid noh ia ki ba ka Tnad kan ioh ia ka jingshaniah na u paidbah” ula bynrap.
Ha kajuh ka por, u bah Prestone ula pyntip ba ka sorkar jylla kan ialeh ruh ban pynkhlain noh ia ki Border Outpost jong ki pulit kiba don ha ki thaiñ khappud bad ka jylla Assam khnang ba yn lah ban ai iaka jingiada bad jingshngaiñ ia ki paidbah nongshong shnong ka jylla.
“Ngin pynkhlain ia ki Border Outpost kiba la don lypa, da kaba thung ar shah ia ki pulit bad nga lah dep ban bthah ban pynkhlain noh ia baroh ki Border Outpost khamtam ha ki jaka kiba don ka jingiakajia pud” la pynkut u Bah Prestone.
