Shillong, Nailar 25: U Myntri ka tnat Social Welfare bah Paul Lyngdoh u ba dei ruh u Chairman ka Regional Committee pynbeit pud ka West Khasi Hills, ula pyntip baka Regional Committee ka West Khasi Hills bad ka Kamrup District, Assam kan sa shong jingialang biang ha ka 28 tarik mynta u bnai ha Shillong.
U bah Paul ula iathuh ba iaka Regional Committee jong ka Kamrup District yn khlieh da u Myntri Sorkar u Chandra Mohan Patowary.
U bah Paul ula pyntip ba ki don kumba 200 tylli ki shnong hapoh ka thain Langpih hynrei kumba 54 tylli ki shnong ki dei kiba don hapdeng ka jingiakajia khappud bad naka liang ki 2 sorkar jylla kin pyrshang ban pynbeit noh ia kane ka jingiakajia hapoh u bnai Naiwieng 2023.
“Ka jingialang kan sdang naduh 1 baje nohphai sngi bad ngi kyrmen ba kane ka jingialang hapdeng ka Regional Committee West Khasi Hills bad ka Regional Committee Kamrup District ka jylla Assam kan long kaba seisoh kum ka jingialang bala pynlong ha Nongstoin bad ha Guwahati” la ong u bah Paul.
U bah Paul ula iathuh ba kane ka jingialang ka ban long haka 28 tarik mynta u bnai kan dei ruh ka jingprat lynti ban poi noh shaka ba kut jong ka jingialang ki Regional Committee hashuwa ban aiti iaki kaiphod shala ki Myntri Rangbah naka bynta ban sdang noh iaka jingleit jurip iaki jaka ha ki thain khappud.
Haba kylli, u Bah Paul u iathuh ba ka sorkar jylla ka don lut iaki kot ki sla haba iadei bad ki 54 tylli ki shnong baka sorkar ka kam ba ki don ha u pud u sam ka Meghalaya bad ki paidbah na kine ki shnong ruh ki kwah ban neh bad ka Meghalaya hynrei napdeng kine ki Shnong, kumba 7-8 tylli ki shnong kila pynpaw ba ki kwah ban don sha Assam.
“Ka thong ka dei ban pyndep iaki jingialang hapoh u bnai Naiwieng 2023 bad hadien kane ki Regional Committee kin pynbiang iala ki kaiphod ban aiti sha ki Myntri Rangbah namar baroh ar tylli ki jylla ki don ka thong ban pyndep iaka jingiakren pynbeit iala u pud u sam hapoh une u snem” ula ong.
