Shillong, Rymphang 25 : U Myntri Rangbah ka Jylla Conrad K Sangma ula pyntip ia ka thong ba angnud na ka bynta ka lawei ka Meghalaya, haba kdew ia ki project ba kongsan bad ki sienjam ki ban pyntyllun shakhmat ia ka roi ka par bad ka jingkiew shaphrang jong ka Jylla.
Haba jubab ia ka jingiatai halor ka mang tyngka ha ka sngi Balang, u Conrad ula ong ba palat 1700 acre ka jaka la dep ban thied na ka bynta ka jingtei ia ka project New Shillong City, kaba la khmih lynti ban plie ia ka lad aikam haduh 1,09,500 ngut hapoh u 2032.
U Myntri Rangbah ula pynbna ba ki project ba T.4,572 klur kila don mynta hapdeng ka jingpyntreikam, kynthup ka Shillong Technology Park Phase-II ba T.120 klur bad ka Meghalaya Skill & Innovation Hub ba T.102.5 klur.
Nalor kane, T. 5,150 klur ki project ki dang don hapdeng ka jingiakren, kynthup ka jingpynshna iing ba 1000 tylli, ka surok baheh 24 meter ka pynkiang bad ka jingsam umbam umdih bad ka bording kaba biang pura.
U Conrad ula iathuh ruh ia ka jingshna ia ka New Meghalaya Secretariat, kaba la tei ha ka jinglut ba T.1,231 klur bad la khmih lynti ban pyndep hapoh u 2027.
U Myntri Rangbah ula pynbna ruh ba ka Meggalaya kan sa long ka Football Capital ka India da ka jingtei ia ka Stadium kat kum ki kyndon ba buh da ka FIFA, ka ban dei kaba nyngkong eh ha ka ri, ka ban don jaka shong haduh 40,000 bad ba lah ban pynlong ia ki jingialehkai AFC bad World Cup Qualifier.
U Conrad ula ai jingtip ruh halor ka jingpynkhreh ka Jylla ia ka National Games 2027, haba pynpaw ba kin don haduh 39 jait ki jingialehkai ki ban long ha palat 19 sngi, bad palat 12,000 ngut ki nongialehkai kin wan ban iashimbynta bad haduh 8000 ngut kin dei ki volunteer na ka Jylla.
Kane ka lympung la khmih lynti ba kan ai ka lad iohkam ia kumba 30,000 ngut bad ka Sorkar bala bei pisa ba T.39.17 klur sha ki 26 tylli ki Sports Association ba kin pynkhreh ia kane ka lympung.
