Shillong, Nohprah 19 : Hadien ka jingpynbna ia ka tarik ban pynlong ia ka elekshon MDC jong ka Khasi Hills Autonomous District Council (KHADC) bad ka Jaintia Hills Autonomous District Council (JHADC), u Symbud Myntri Rangbah ka jylla u u Bah Sniawbhalang Dhar uba long ruh u Nongialam ka seng National People’s Party (NPP) ula pynpaw ia ka jingsngew skhem jingmut ba ka seng NPP kan thaw hi marwei ia ka Executive Committee (EC).
“Ngi dang trei sha kaban ioh ban thaw hi tang ma ngi ia ka EC.Ngi kwah ban jop bun ngut ban ioh ia k abor synshar. Hynrei lada ngi duna pat, ngi long kiba kloi ban iatreilang bad kiwei pat ki seng sain pyrthei, ngin pdiang ia ki khlem kano kano ka jingartatien” la ong u Bah Sniawbhalang.
Ula pynpaw ruh ba ka seng NPP kala pynkhreh bha na ka bynta kaelekshon MDC kaban wan bad ula pynbna ba ka seng kala long kaba la pynkhreh ban iakhun ha ka KHADC bad JHADC.
“Ngi lah long kiba la pynkhreh bha, ngi lah long kiba la khreh na ka bynta ka elekshon ha baroh ar tylli ki District Council ha Khasi Hills bad kumjuh ruh ha Jaintia Hills,” la kren sngewskhem u Bah Sniawbhalang.
Ha kaba iadei bad ka jingjied ia ki kyrtong, ula iathuh ba kumba 80% na ka thup kyrteng jong ki kyrtong la dep ban pynbeit.
“Lehse shwa ka Christmas lane ha ka taiew banyngkong jong u Kyllalyngkot, ia ki kyrteng kiba dang sah yn sa pynbna paidbah noh. Ngi dang iaid ha ka lynti bad lada ia ka wat baar jong ki kyrteng la dep ban pynbiang lut yn sa pynbna noh hynrei lada ym pat dep lut kumta kan sa don sa ka thup kyrteng ha ka wat kaba lai” ula ong.
Ula ong ba ka jingjied ia ki kyrtong kadei kaba la pynshong nongrim ha ka jingdon burom ka jongki bad da kaba pynlong ia ka jingiasyllok ha kiba bun ki bynta.
“Ngi lah iasyllok bad ki nongialam ki jong ngi kiba don ha ki madan, la kidei ki rangbah, longkmie, kiba dang samla ne kiba la heh ka rta. Kam don satia kano kano ka jingiadei shimet ne jingiadei paralok. Ka rukom treikam ka sdang na ki kyrdan jong ki Unit, poi sha ki Block, District bad khatduh eh sha ka State. Lada ki Block ki tyrwa ban pynieng da ka kyrtong kaba dei ka longkmie ngi burom ia kata bad lada dei da kiba la heh ha ka rta ruh ngi burom ia kata. Hynrei kaba kham bun hi ngi peit sha ki bynta kaba ki kyrtong ki lah ban jop iaka elekshon. Ngi shaniah skhem ha ki nongialam kiba don ha ki shnong ki thaw ba kin ai ia ka jingtyrwa kaba dei” la ong u Nongialam ka NPP.
Ha kaba iadei bad ka jingweng jingkyrshan noh ka seng Congress na ka Executive Committee (EC) ha ka District Council, u Bah Sniawbhalang Dhar ula ong ba kadei ka jingleh politik.
“Kane kadei tang ka jingleh politik. Lada ki kwah ban weng ialade kila dei ban leh naduh ki por kiba mynno. Balei ki ap haduh ka khyllipmat kaba khatduh? Hynrei na ka NPP ngi pdiang ia baroh ki seng saiñ pyrthei ban iatreilang. Ngim don kano kano ka ishu bad ki. Ka jingkhang ka long beit kaba plie” ula ong.
U Bah Sniawbhalang ula pynpaw ruh ia ka jingsngew ba ka seng NPP kan mad ia ka jingiakhun hapoh ka elekshon jong ka KHADC bad JHADC namar ka jingdon bun tylli ki seng saiñ pyrthei kum ka UDP, VPP bad ka Congress, hynrei ym shim la kubur pat ba katei kadei ka jingpyni ia ka jingtlot jong ka NPP.
“Ha rilum Garo ka long beit hapdeng tang jong ar tylli ki seng saiñ pyrthei, hynrei ha rilim Khasi bad Jaintia ki don bun kum ka UDP, NPP, VPP, Congress kumta kan phiah ia ka jingioh vote. Kane kam mut pat ba ka NPP ka tlot. Ha ka jingshisha, kumba long mynta ngi khlain bha, kumta kumno kiwei pat kin kam ba ngi tlot? Hooid ki jingtynjuh kin don ha ka politik, hynrei ngi long kiba kloi ban iakhun pyrshah ia ki” la ong u Bah Sniawbhalang.
Dang shen ka sorkar jylla kala pynbna ban pynlong ia ka elekshon jongka KHADC bad JHADC ha ka 21 tarik u Rymphang, 2025.
 bad ka Jaintia Hills Autonomous District Council (JHADC), u Symbud Myntri Rangbah ka jylla u u Bah Sniawbhalang Dhar uba long ruh u Nongialam ka seng National People's Party (NPP) ula pynpaw ia ka jingsngew skhem jingmut ba ka seng NPP kan thaw hi marwei ia ka Executive Committee (EC).){kind=link}