Shillong, Nailar 12 : Ka Iingkashari Meghalaya High Court ka la buh por ban bishar bniah sa ïa ki katto katne ki ujor kam bymman ba iadei bad ka jyrsieh thungkam Nonghikai LP u snem 2009 ha ka 29 tarik u Nailar.
Ia kine ki ujor la shong bishar shibynta da ka Iingkashari ba khlieh da u Chief Justice IP Mukerji.
“Kine ki aplikeshon la shong bishar da ki bynta bynta mynta ka sngi. Buh ia kine ki aplikeshon ban sa shong bishar biang ha ka 29 tarik Nailar, 2025” ong ka Iingkashari ha ka hukum ba pynmih ha ka sngi Nyngkong (11 tarik Nailar).
Kine ki aplikeshon ki kyrpad ban pynduh pyndam noh ia ka jingbishar kam bymman pyrshah ia ki laingut ki nongshah kynnoh kynthup ka Myntri Sorkar Kong Ampareen Lyngdoh ha ba iadei bad ka jyrsieh thungkam nonghikai LP u snem 2009.
Ka mukotduma ka mih na ka jingjied bad jingthung ia ki Assistant Teacher ha ki skul Lower Primary ka Sorkar Jylla ha u snem 2008-2009. Ka Central Bureau ofInvestigation (CBI) kala tohkit ia kane ka kam bad kynnoh ba kine ki nongshah kynnoh kila leh thok ha ka jingjied da kaba tah sia lieh, soithok ia ki result sheet ban iarap ia ki kyrtong ba ki jied.
Ha ka 20 tarik Jymmang, ka Iingkashari kala bthah ba baroh ki hukum bala pynmih hashuwa kin dang iai bteng ban treikam tad haduh da dep bishar ia kine ki aplikeshon lane pynmih da kiwei pat ki hukum, kat kiba kloi.
Ha ka 11 tarik Iaiong, ka Iingkashari kala kyrpad ia u Special Judge (CBI) ban pynkynriah shuh ia ka jingshong bishar ia ki sakhi ha kane ka jyrsieh thungkam nonghikai. Ia kane ka rai ka Iingkashari la shim khnang ban lah pyndep noh ia ka jingbishar ia ki aplikeshon ba kyrpad ban pynwai noh ia ka jingbishar kam bymman, bala mudui kat kum ka kyndon 482 jong ka Criminal Procedure Code.
U Nongiasaid ain ula tyrwa haduh 492 ngut ki sakhi, hynrei ula rai ban weng noh ia 317 ngut bad bynrap sa 6 ngut ki sakhi. Ka Iingkashari kala bthah ba ka jingpynduna ia ki sakhi kam dei ban iapein bad ka jingpynbiang ia ki sakhi. Hashuwa kane, haduh 28 ngut ki sakhi lah dep ban shong bishar.
