Shillong, Nohprah 30: U Lat ka jylla u C.H. Vijayashankar, hynne ka sngi Nyngkong ula iashimbynta ha ka jingrakhe kynmaw burom ia ka lyngkhuh sngi iap ba 162 jongu Kiang Nangbah, u Khla Wait ka Ri uba aiti iala ka jingim ban iakhun pyrshah ia ka sorkar Bilat.
U Lat ula leit buh syntiew ha u Mot jong u e u riewkhraw uba don ha Jowai, West Jaintia Hills District.
U Lat ula ong, ka jingialam jong u Kiang Nangbah ha u snem 1862 ban iakhun pyrshah ia ka sorkar Bilat ka dei ka dak jong ka jingshlur bad ka jingaiti ka jong u ban iada ia ka jaidbynriew Jaintia, ia ka kolshor bad ia ka jinglong kyrpang ka jongka.
Ula iaroh ia ki kam bad ia ka jingshimkhia jongka Seinraij Jowai ha kaban pynneh pynsah ia ka kolshor bad ia ka riti dustur jong ki jaidbynriew Pnar.
Hadien kane, u Lat ula leit ban iashimbynta ha ka prokram kaba la pynlong da ka Kur Passah ha kaba ula iaroh ia ka jingtrei shitom ka jongki ban pynneh pynsah ia ki jaka kyntang bad iaka riti dustur tynrai.
U Lat haba ai jingkren ha ka jingialang, ula pynpaw ia ka jingkongsan ban don ia ka jingiatylli, ka jingithuh lyngba ka kolshor bad ula iaroh ia ka Kur kaba la trei shitom kaba la kylla long ka nuksa ia kiwei pat ha ka imlang sahlang ban iada ia la ka jinglong kyrpang.
U Vijayashankar ula plie paidbah ruh ia ka jingpynitynnad “Ka Mujra KaMukan” jongka Kur Passah.
Ha ka lynti ban wanphai, u Lat ula leit ruh ban jngoh ia ka Nartiang Temple bad ia ki mawbynna kiba don ha Nartiang bad kane ka jingleit jngoh ka jongu ka pyni ia ka jingkongsan ha kaban kyntiew bad pynneh pynsah ia ka kolshor ba riewspah jong ka jylla bad iaka histori jong ki barim bajah.
