Nongstoin, Risaw 10 : U Deputy Commissioner ka West Khasi Hills District, ula pynmih ia ka Standard Operating Procedure (SOP) kiba teh kyndon ia ka jingpynlong ia kano kano ka jingiakop khwai dohkha hapoh ka District.
U Deputy Commissioner Bah Garod LSN Dykes ula pynmih ia kane ka SOP haba pyntreikam ia ka hukum jong ka Sorkar Jylla No. DCA .33/2012/520 ba pynmih ha ka 19.09.2023.
Kane ka jingteh kyndon kala wan jia ruh hadien ka jingduhnoh kawei ka Longkmie iala u Khun ba dang shu kha tang namar ka jingslem ban poi sha Hospital, namar ka jingkah lynti ki rawon kiba iashimbynta ha ka jingiakop khwai dohkha ha pung Pamphyrnai, kaba la jia ha ka 17 tarik u Nailur.
U Deputy Commissioner ha ka hukum ba u pynmih hynnin ka sngi nyngkong, ula pyntip ba dei tang ma u (DC) ba don ka bor ba lah ban ai jingbit ha kaban pynlong ia kano kano ka jingiakop khwai dohkha hapoh u pud u sam ka District.
Ula ong ba ki riewshimet, ki kynhun ne ki seng kiba kwah ban pynlong ia ka jingiakop khwai dohkha kin hap ban pan jingbit na u bad ki dei ban aiti ia ki aplikeshon kat kum ki Application Form ha ryngkat ki kot ki sla ban kyrshan/pynshisha.
Ula ong, kine ki kot ki sla ki kynthup ia ka Clearance Certificate na u Superintendent of Police ka District, ka No Objection Certificate (NOC) na u Superintendent of Taxes, West Khasi Hills kaba long kat kum ka shithi bala phah da u Commissioner of Tax ba 1 tarik Nailur, 2023, ka NOC na u EE ka PWD (Roads), WKH lada ka pung ka don hapoh 500 meter na ka surok Highway ne State road.
Nalor kane, ki nongpynlong ia ka jingiakop khwai kin hap ioh ruh ia ka NOC na u Rangbah Shnong/Sordar Shnong, NOC na u trai Pung Dohkha lada dei ka pung shimet, NOC na u Rangbah Shnong/Sordar bad KHADC lada dei ki Wah, NOC na u Superintendent of Fisheries ka West Khasi Hills bad NOC na u SE/EE ka PHE &DBSM ka West Khasi Hills na ka bynta ki jaka leit bar.
U Deputy Commissioner ula ong ruh ba ki nongpan jingbit ki dei ruh ban ai ia ka ‘Undertaking’ ban pynthikna ia ka jingbret ia ki niut ha ki jaka ba dei bad ban ym die kyiad ne pynkhalai nalor ka jingpynbiang ia ki lad ai jingsumar ha ka jaka khwai.
La ong ba ki aplikeshon ki dei bala pynbiang lut ia baroh kine ki jingdonkam ki dei ban poi sha ka Ophis jong u ym duna ia ka 7 sngi shuwa ka sngi iakop khwai haba bynrap ba lada ki poi hapoh ka 7 sngi, ia kane ka aplikeshon yn shu kyntait beit.
