Guwahati, Lber 09: U Myntri Rangbah Duh ka Ri Narendra Mod ula buh mawnongrim ia ki project ba kot haduh T.55,600 klur jong ki Jylla ka thain Shatei Lam Mihngi kynthup ka Jylla Meghalaya.
Ia une u mawnongrim la buh ha ka jingialang Viksit Bharat Viksit North East Program kaba long ha Itanagar, Arunachal Pradesh hynne ka sngi Saitjain.
Ka Jylla Meghalaya ruh ka dei kawei kaba ioh ia kine ki project bala pyllait da u Myntri Rangbah Duh kaba kot palat ia ka T.290 klur.
Kine ki project ha Meghalaya ki kynthup ia ka jingpyntrei ia ka IT Park ha Tura, ka jingshna ia ka surok 4-lane bad ka jingpynkylla ia ka surok two-lane sha ka four lane ha New Shillong Township.
U Myntri Rangbah Duh ula plier uh ia ka Farmers Hostel-cum-Training Centre ha Upper Shillong.
Haba kren ha ka jingialang, u Myntri Rangbah haba kdew ia ki project ba T.55,600 klur, ula ong ba 35000 tylli ki Longiing ka Arunachal Pradesh kila ioh jingmyntoi da ki iing pucca, ka kor um iing sha ki hjar tylli ki longiing bad ki project lad pyniasoh sha kiba bun ki Jylla jong ka thain.
Ula ong ba ki project ha ka pule dangle, ki surok, ki lynti rel, ki hospital, ki kam jngohkai kila wan da ka jingkular jong ka Viksit Northeast bad ong ba ka jingai song pisa ha kine ki san snem bala leit ka long haduh saw shah ban ia ki snem bala leit noh.
“Ka thain Shatei Lam Mihngi baroh kawei kala sakhi ia ka jingmut Modi ki Guarantee da ki kam pynroi bala pyntrei” ong u Modi haba bynrap “La ka dei ha kano kano ka por, u bnai ne u snem, u Modi u trei beit thik tang na ka bynta ka Ri bad ki paid nongshongshnong”.
U Modi ula kren ruh halor ka jingrai ka Cabinet ia ka UNNATI scheme ban pynroi ia ki kam seng karkhana hapoh ka thain Shatei Lam Mihngi bad ong ba ka rukom treikam jong ka Sorkar kala paw shai bha lyngba kane ka skhim kaba la lah ban pynbna paidbah tang shisnem bad la lah ruh ban pynmih ia ki kyndon treikam.
Ula kdew ia ka jingtynruh ia ki kam pynroi kajuk ba mynta ha kine ki 10 snem bala leit noh, ka jingpyntreikam ia ki soskular iasuk bad ka jingpynbeit ia ki jingiakajia khappud.
Ka sienjam ban shim mynta,u Myntri Rangbah Duh ula ong ba ka dei ka jingpyniar ia ki kam seng karkhana hapoh ka thain. “Ka pisa ba T.10,000 klur jong ka UNNATI scheme kan plie ia shibun ki lad ban kynshew kam bad aijam aijam hangne hapoh ka thain” kular u Modi haba batai ia ki jingpynleit jingmut jong u ha ki startsup (sengkam) ki kor thymmai, ki kam jngohkai pyrthei bad kiwei kiwei ki ban plie lad ia ki samla jong ka thain.
Haba pashat jingshai halor ka jingshimkhia ka Sorkar ban pynsuk ia ka jingim ki kynthei hapoh ka thain, u Myntri Rangbah Duh ula pyntip ba la pynhiar dor T.100 ia ka gas cylinder kum shibynta jong ka jingrakhe ia ka International Women’s Day hynnin ka sngi.
Haba ianujor ia ki kam bala leh ban pynkhlain ia ki lad pyniasoh naduh ba ioh ia ka Jinglaitluid tad haduh u 2014 lem bad ki snem hadien u 2014, u Modi ula pyntip ba ka Sorkar kala dep shna haduh 6000 Km ka surok highway ha kine ki 10 snem bala leit haba ianuor bad 10,000 km ha ki 70 snem ba mynshuwa bad kala sieng lynti rel ruh haduh 2000 Km.
