Shillong, Kyllalyngkot 15: U MLA ka South Shillong Constituency u Bah Sanbor Shullai haka sngi Saitjain ula buh ia u mawnongrim naka bynta ban tei iaka Primary Health Centre (PHC) ha Lumparing ha ka jinglut jingsep kaba kot T.5 Klur lyngba ka Scheme SPA jong u snem 2022-23.
Ha katei ka jingbuh mawnongrim la ia donlang u Bah Doncaster Shabong uba long u Rangbah Shnong ka Lower Lumparing, u Rangbah Shnong ka Upper Lumparing bah H.B Wahlang, u Rangbah Shnong ka Kynjat Phutbol-Riat Laban Bah Shaiphar Wahlang, ki nongshong shnong bad kiwei kiwei.
Ki nongkren haka jingialang kila iaroh iaka jingtrei shitom u MLA Bah Sanbor Shullai, uba la wanrah ia ki kam pynroi ki bapher ha ka shnong ka thaw bad ha ka constituency baroh kawei.
U Bah Sanbor haba ai jingkren ula ong, shen yn sa sdang noh iaka kam ban tei ia katei ka jaka sumar bad yn ym pynslem shuh khnang ba kan long ka jingkyrkhu kaba khraw iaki nongshong shnong jong ka thaiñ Lumparing bad Laban haba ki pang ki shitom.
Ula pynpaw ruh iaka jingsngewnguh iaka Dorbar Shnong Lower Lumparing bad iaka Lumparing Sports Club kiba la noh synniang ei iala ka jaka na ka bynta ban shna ia katei ka jaka sumar bad ula iaroh ruh iaka jingshimkhia ki heh ophisar ka tnad ka koit ka khiah bad ka jingshimkhia lang jong ki nongshong shnong ban lah ban pynurlong ia katei ka jingangnud kaba la slem jong u paidbah.
