Nongpoh, Risaw 17: U MLA ka Umsning, Bah Jason S Mawlong hynne ka sngi nyngkong u la buh mawnongrim ban shna ïaka kamra klas (Additional Classroom) jong ka Balawan College ha Umsning.
Ïa katei ka kamra klas la mang pisa lyngba ka skhim SRWP jong u snem 2019-20 haka jinglut kumba 8 lakh tam.
Ha kane ka sngi la iadonlang ruh u Raja Brahma BDO ka Umsning, Fr. Pius Shadap Parish Priest ka Umsning Parish, Dr. (Fr) Laurence Kharluni Principal Balawan College, U Babu Carlus Kharkongor bad kiwei kiwei ki riew rangbah.
Haba ai jingkren, u Bah Jason S Mawlong u la pynpaw ka jingsngewkmen bala ioh ban buh mawnongrim naka bynta ban shna bad pynheh ïaka kamra klas ha kane ka jaka pule, khnang ba ki khynnah pule kin ioh ia ki kamra klas ba biang.
U la kyntu ïaki khynnah pule ba ki dei ban minot thop bad ban don ruh ka thong haka jingim jong ki ban dang kiew shaphrang ha baroh ki liang khlem da pynsepei kai ïaka por.
Une u MLA ula pynpaw ruh ba un dang iai bteng ban ai ka jingïatreilang bad katei ka college naka bynta ban nang kyntiew ïaka pule puthi bad khamtam ba katei ka college ka dei kaba la paw haka thaiñ Umsning.
