Nongpoh, Nohprah 15 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hynne ka sngi palei, ula buh ia u mawnongrim ban shna thymmai daka surok rong ba paka ha ka shnong Umskun kaba don harud ka surok National Highway-6 hajan Nongpoh, kaba la mang ban shna ha ka jinglut ba kot T. 4.5 klur.
Ia kane ka sngi ba kmen jong ki paid nongshongshong ka Umskun la pynshongkun ruh da ka jingiadonlang u Deputy Commissioner ka District u Arpit Upadhayaya, ka MDC ka Umsning Kong Macdalyne S Mawlong, u SE ka PWD Shillong Circle S Kyndiah, ki Nongialam Shnong bad kiwei kiwei.
Haba kren ha ka jingialang, u Symbud Myntri Rangbah ula pynpaw ia ka jingkmen ba ka Sorkar MDA kala nang lah ban pynurlong ia ki jingangnud jong u paidbah ha ki shnong bapher bapher.
“Ka Sorkar ha kine ki saw snem shiteng kala pyntreikam ia shibun ki kam pynroi ha Jylla bad wanrah ruh ia ki skhim bapher bapher na ka bynta ka bha ka miat u paid nongshongshnong. Ngi la pynleit jingmut bha ha ka koit ka khiah bad ka pule ka dangle ki ban ai shibun ki jingmyntoi ban kiew ka Jylla” ula ong.
“Ngim sngewpher ia ki jingshah kren bein shah kren khoh namar ngi tip ba kan nang jur mynta lei bala jan ka elekshon hynrei ka Sorkar Jylla kam sngewpher ne pynsngap ia kiei kiei kiei hynrei kan iai trei beit ia ki kam ki ban pynmyntoi ia u paidbah” ula bynrap.
U Symbud Myntri Rangbah ula pynbna ruh ba ka Sorkar Jylla hynne ka sngi kala rai ban nang pynheh ia ka bainong jong ki nongtrei Mid Day Meal na ka T.1000 sha ka T.2000.
Halor ka surok Umskun, u Symbud Myntri u pyntup ba ula dep bthah ia ka Tnad PWD ba kan pynsdang noh mar mar ha kaban pyntrei ia kane ka surok bad ban pynsted ia ka jingkhot tender ban aiti ia ka kam sha ki Contractor.
