Shillong, Naiwieng 16 : U Myntri Rangbah ka Jylla Conrad K Sangma bad u Myntri ka DoNER Jyotiraditya Scindia ha ka sngi Thohdieng, kila pynbna ia ka jingbuh mawnongrim ban shna ia ka ‘Skywalk project’ ha Mawkdok, East Khasi Hills na ka rynsan Cherry Blossom Festival.
Kane kan dei ka project ba nyngkong eh hapoh ka thain Shatei Lam Mihngi.
Ka mawkdok ka dei ka jaka jngohkai kaba bna nam bha bad ka dei ka jaka kaba ki nongshangkai pyrthei kim ju iaid lait khlem da sangeh bad hiar peitkai haba ki leit sha ka thain Sohra.
Ka skywalk project ka dei ka project bala shimkhia da ka Sorkar ban pynkhlain ia ki kam jngohkai ha ka thain. “Ka kam jngohkai ka dei kaba kongsan tam na ki lad ban pynroi ia ka thain. Ngi kyrmen b aka DoNER Ministry kan iai bteng ban kyrshan ia ka thain ba kan kyntiew ia ki kam jngohkai” ong u Myntri Rangbah.
Haba pynpaw ba ka Sorkar ba don jingthmu ban pyniaid iew ia ka Meghalaya sha ka pyrthei, u Myntri Rangbah ula ong ba ka jingiatreilang bad ka Japan ka dei kaba kyrpang bha bad kan nang kyntiew ia kane ka tamasa sha kawei pat ka kyrdan. Ula ong ba ka jingiatreilang bad ka Japan kan pynlong ia ka Pyrthei ba kan tip shaphang ka Meghalaya, ka kolshor bad ka jingiajan bad kiwei ki ri ka dewbah Asia.
U Myntri Rangbah ula ai khublei ia ka Japan kaba la buh ia ka ‘Japan Arena’ ha ka lympung jong ka tamala kaba pyni ia ka jingriewspah ka kolshor, ka bam, ka rwai ka siaw bad ki kam ialehkai.
Haba pynbna bala plie ia ka Japan Arena, u Myntri ka DoNNER Jyotiraditya Scindia ula ong “ Ka long kaba sngewtynnad ban don hangne ha Meghalaya bad ban sakhi ia ka jingshongshit jong ki paidbah ka thain Shatei Lam Mihngi. Nga sngew kmen eh ban iohi ba ka tamasa Cherry Blossom ka dei kaba la heh bha. Khublei ia ka Japan namar ka jingiadei kaba iajan bad ka India”.
U Scindia ula iaroh ruh ia u Myntri Rangbah namar ka jinglong nongialam jong u ban kyntiew ia ki tamasa kum ka Cherry Blossom. “Ngam pat ju iohi ia kum kane ka jingshongshit ha kino kino ki concert ha ri India. Khubei ia u Conrad bad ia ki paidbah ka Meghalaya” ong u Scindia.
Ula ong ba ka Meghalaya kam dei ban shu kut tang ka Music Capital ha India hynrei ha dewbah Asia.
U nongrwai R&B ba pawnam Akon bad ki Boney M kila pynlynguh ia ka madan kurkalang ha ka sngi Thohdieng, kaba la pynhun jrut ia ki nongleit kai sha ka tamasa.
