Shillong, Kyllalyngkot 10: U Myntri Rangbah ka jylla u Conrad K Sangma, hynne ka sngi ula buh ia u mawnongrim ban tei ia ka Water Supply Schemes na ka bynta ki shnong kiba don ha ka thain New Shillong Township ba kynthup ia ka Mawdiangdiang, Mawkasiang, Mawpdap, Diengiong, Mawlong, Siejiong bad Tynring.
The NPP-led MDA Govt. had pursued with @MoJSDoWRRDGR for the inclusion of Census Towns under @jaljeevan_.
These two projects that we laid foundations for today are the fruition of our persistence to ensure water supply to our households under census towns pic.twitter.com/yAmmcaA2AT
— Conrad Sangma (@SangmaConrad) January 10, 2023
Ha katei ka jingialang buh maw nongrim la iadonlang u MLA ka Mawryngkneng Bah Pyniaid Sing Syiem bad kiwei kiwei.
Haba ai jingkren u Conrad K Sangma, ula ong, ka jylla naduh u snem 2018 wat hashwa ban sdang pyntreikam iaka Jal Jeevan Mission kala sdang iaki kam ki jam ban pynkhie im biang iaka tnad PHE.
“Ha katei ka por ka PHE kam don lypa ia ki prokram namar ia ki Rural Water Supply Scheme ki bapher la dep ban pynsangeh hadien ba ka 14th Finance Commission kala pynkylla iaka bhah jongka Central Tax bad kumta ngi la don ha ka khep kaba eh ha kaba iadei bad ka tnad PHE khamtam haba ka PHE kam don iaka pisa ka tyngka ha katei ka por” ong u Conrad.
Ula ong, ka prokram Jal Jeevan kadei ka jingkyrkhu kaba khraw ia ka tnad.
“Kala don ka jingkylla ha ka jingtreikam jong ka tnad PHE bad kane kala pynmih iaka resol jong ka jingkylla ha ka jingim jongki paidbah” ong u Conrad.
U Myntri Rangbah ula pyntip ba kan dei tang ka jylla Meghalaya kaban ioh pdiang iaka bonus package ne ka bhah kaba kyrpang na ka bynta 3 snem kynthih halor ka jinglah ban pyndep iaki project.
Ula pynthikna ba ki projek pynbiang umbam umdih yn pyndep ha ka por kaba la buh bad ula kyntu ia ki ophisar jong ka tnad ba kin bteng ban khmih bniah ia ki projek.
Ula kyntu iaka imlang sahlang bad iaki shnong ki thaw ba kin iatreilang na ka bynta ban pynneh pynsah iaki wahduid, ki tyllong um bad ki khlaw ki btap.
“Ka Jal Jeevan prokram kadei ka prokram kaba kongsan, kumta ka imlang sahlang kadei ban iashimbynta thikna ban pynlong ia kane ka prokram kaba iai neh” ong u Conrad.
Ha katei ka prokram la wan ban iashimbynta da ki nongialam shnong, ki riewpawkhmat ka thain, u MDC ka Laitumkhrah Bah F.J Lakadong bad u Commissioner & Secretary ka PHE u Syed Md Andaleeb Razi.
