Khanapara, Risaw 03 : U Myntri Rangbah ka Jylla Conrad Kongkal Sangma hynne ka sngi ula buh ia u maw nongrim ban pynieng iaka “PA Sangma International Medical College & Hospital” ha University of Science and Technology Meghalaya.
Kane ka project ka dei ka jingangnud jong ka ERD Foundation bad u Nongseng uba dei u Chairman u Mahbubul Hoque ban pynieng ia kane ka Medical College hapoh ka Jylla.
Ia une u mawnongrim la buh da u Myntri Rangbah ka Jylla ha ka jingiadonlang u Rhonda Vetere, uwei na ki Nongialam na ka Ri USA ha ka jingiadon ryngkat u Lat barim ka Jylla R.S. Mooshahary, Myntri ka tnad pule puthi ma Lahkmen Rymbui, u Dr R. C. Deka, Director barim ka AIIMS; Dr Dhrubajyoti Borah, VC, Srimanta Sankaradeva University of Health Sciences bad kiwei kiwei.
With the standards that @USTMeghalaya upholds and the service that it continues to render Meghalaya and the North East, the P A Sangma International Medical College & Hospital will surely be a blessing to the region. pic.twitter.com/2ABuTuSX3P
— Conrad Sangma (@SangmaConrad) October 3, 2022
Ki Doktor ba pawkhmat na kylleng ki Jylla ka thain Shatei Lam Mihngi bad ka Ri India kila iadonlang ha kane ka jingialang ban sah jingkynmaw jong ka USTM.
Haba kren sha ki lad pathai khubor, u Mahbubul Hoque ula ong “Kawei na ki mat treikam jong ka Medical College bad Hospital ka dei ka jingdon ka hospital Super Speciality ba 200 jingthiah ba don ia baroh ki kot ki bor ka juh ka mynta bad ki jingwad bniah ba bun jait ia ki jingpang.
Haba pynurlong ia ka mission, kane ka Hospital kan ai ka jingsumar ei ia baroh ki nongpang kiba wan na ki longiing kiba duk, ong u Hoque haba bynrap “Ngin pynlong ia ka jingshakri kaba khlem siew pisa khyndiat ruh ia ki nongshongshnong ka Jylla Meghalaya”.
Ka thong jong kane ka jaka pule ba tnymmai ka long ban khring ia ki nongpang bad ki samla pule na ki Ro ASEAN bad ha kaba sdang, kan pyrshang ban khring ia ki samla pule na Bangladesh, Nepal bad Bhutan.
Haba jubab ia ka jingkylli sha ki lad pathai khubor, ka Rhonda Vetere ula pynpaw ia ka jingkmen ban long ka Ambassador ka UTSM sha ki ri ka pyrthei.
Haba kren ha ka jingialang, u Myntri Rangbah ka Jylla ula ong ba ka long ka sngi kaba khraw shibun ba ia une u mawnongrim la buh ha ka jingrakhe ka Ri India ia ka jingdap 75 snem ka jingioh laitluid bad ka jingdap 50 snem jong ka Jylla Meghalaya bad ruh ka jingdap 75 snem ka sngi kha jong u PA Sangma.
“Ka Medical College jong ka USTM kan dei kaba nyngkong eh jong ki riew shimet ka ban seng ha Jylla Meghalaya” ula ong haba bynrap ba ka jingpynia don bynta ia u (L) PA Sangma ha ka jingseng ia kane ka College ha USTM bad ban jer kyrteng ia ka College hadien jong u ka dei ka jingnoh synniang kaba khraw eh ia une u Nongialam bala khlad noh.
