Shillong, K’Lyngkot 27: U Myntri Rangbah ka Jylla Conrad K Sangma hynne ka sngi Nyngkong ,u la buh Mawnongrim ia ka Greater Tura Urban Water Supply Scheme haka jingialang kaba la long ha District Auditorium, Tura West Garo Hills.
Ka jingbuh maw nongrim iaka Greater Tura Urban Water Supply Scheme, kadei ka sienjam kaba kongsan ha ka jingthmu jong ka Sorkar ban pynbiang ïa ka um bam um dih ha man ki tyllong iing jong ka sor Tura.
Haba kren ha kane ka sngi, u Myntri Rangbah u la ïaroh ïa ka jingtrei shitom jong u Myntri ka tnat PHE, u Principal Secretatary bad ki ophisar ka tnat ban pynurlong iaka jingangnud ban sdang noh iaka project Greater Tura Urban Water Supply Scheme.
U Conrad u la ong ba kane ka sngi kadei ka sngi ka ban sah jingkynmaw naka bynta ki paidbah ka Tura baroh kawei.
U la pynkynmaw ba ia kane ka Scheme la thmu naduh u snem 2004 da u P A Sangma (Bam Kwai Dwar U Blei) hadien bala bishar ia ka jingeh jong ki nong shong shnong ban ioh ka um kaba tista ha sor Tura.
U Conrad u la ong ba ka jingpyntreikam ia kane ka projek ka long kaba donkam namar ym tang kan pynbit pynbiang iaka jingdonkam um hynrei ka jingshna iaki jaka pyllang um kan long ruh ki jaka jngohkai pyrthei, ki jingdonkam na ka bynta ka tnat ri dohkha bad kan pynbiang um ruh naka bynta ka rep ka riang bad kiwei kiwei ki kam kiba myntoi iaki paidbah.
“Ha ryngkat bad ka jingkyrshan naka Special Assistance on Capital Investment ka Sorkar Pdeng la ioh ban buh ïa u mawnongrim ban pyntrei iaka Greater Tura Urban Water Supply Scheme haka jinglut ym duna ia ka T. 400 klur bad ia kane ka project la buh thong ban pyndep hapoh 24 haduh 36 bnai” la ong u Conrad.
U Conrad u la khot bad wer ruh ia ka jingiatreilang jong ki Nokma ban sumar bad pynneh iaki jaka pyllang um.
Haba pynpaw ba tang ka jingpyntreikam ïa kine ki skhim kan ym urlong khlem ka jingkyrshan jong ki paidbah ka thaiñ, u Myntri Rangbah u la ong “Iaki jaka pyllang um, donkam ban iada, ban pynneh pynsah ha ryngkat ka jingiatreilang bad ki heh jong ki tnat ka rep ka riang, ka tnat jngohkai pyrthei namar ki long ki lad kamai lyngba ka KFW”.
Ha kajuh ka por, u Myntri Rangbah ka Jylla ula pyntip ruh ba la dep ban buh ïa u mawnongrim na ka bynta ban tei ia ka Integrated Administrative Complex kaba thymmai bad ka jingtrei ban tei ïa kane ka projek kan sa sdang noh shen bha ha Tura ka ban pynbiang ïa ki jingdonkam baroh sha ki paidbah ka thaiñ.
Haba kdew shaphang ka jingpynroi ïa ka IT Park ha Tura kaba dang ïaid shakhmat, u la ong “Ynda la pyndep ia kane ka project, kan ai kam ai jam ïa ki samla ka thaiñ”.
U la ong ruh ba ka jingkamai liengsuiñ na Tura Baljek sha Umroi ka dang don ha ka jingpynkhreh.
Haba pyntip ba ïa ka bynta kaba ar jong ka Tura Beautification, Street Light, u Myntri Rangbah u la ong ba mynta u snen yn pyntreikam bad ia kane donkam ka jingkyrshan na ki paidbah ka Tura ban pynneh ïa ka jingkhuid jingsuba.
Naka liang u Myntri ka tnat PHE, u Marcuise Marak u la ong ba katei ka skhim hapoh ka jingïalam jong u Myntri Rangbah ka Jylla ka dei ka sienjam kaba pawnam ha ka jingïaid lynti jong ka Jylla Meghalaya ban pynbiang ïa ka um kaba biang sha kawei pa kawei ka longïing hapoh ka Jylla.
U Marcuise u la pyntip ba haki snem bala dep tang 4550 tylli ki longïing haki thain nong kyndong kiba la ioh um ha ki tyllong iing hynrei mynta kumba 5 lak tylli ki longïing ki la ioh um lyngha ka skhim JJM.
U la batai ba ki projek PHE ki donkam ban maramot bad ban shimkhia hadien ba la dep pyndep ia ka projek kaba don ka jinglut jingsep bad kiwei kiwei ki jinglut bad namar kata la thaw ia ka Village Water and Sanitation Committee (VWSC) ban shimkhia ia kine ki kam maramot ne ban sumar iaki project.
Haba kyntu ïa ki paidbah ba ki dei ban shim ïa ka jingkitkhlieh bad ban don ïa ka jingsngew trai, u Marcuise u la ong “Ki briew ki dei ruh ban sumar bha ïa ki jaka ba la ai da ka Sorkar khnang ba ki kam pynroi hapoh ka Jylla kin ïaryngkat kyrdan bad ki kam pynroi ha kiwei ki Jylla ka ri”.
Naka liang u Chief Secretary u Bah DP Wahlang u la ai ka jingkitbok kitrwiang ïa u Myntri Rangbah ka Jylla ha ka sngi kha jong u bad ong ba kane ka projek ka dei ka jingai sngewbha jong u sha ki paidbah ka Jylla.
U Bah DP Wahlang u la pyntip ba dew ba kin don sa 66 tylli ki Pipe thymmai bad yn shna sa 3 tylli ki jaka pyllang um hapoh kane ka projek.
U la pyntip ruh ba kane ka projek kan pyndap ïa ka jingdonkam um kaba 30 million litar ha ka shisngi na ka bynta ka Tura.
