Shillong, Jymmang 15 : U Myntri Rangbah ka Jylla hynne ka sngi Palei, ula buh mawnongrim ban tei ia ka Indigenous Cultural Centre jong ka Seng Khasi, Sengkmie, ha Mawkhar, Shillong.
Kane ka jingtei ka dei ka ban tei ha ka jinglut ba T.15 klur bad la tei ia ka ban pynlong kum ka khyrdop kaba im jong ka jinghiar pateng ki Khasi. Kan dei ka jaka kaba ki jingleh tynrai kin long ym tang ban shu buhnam hynrei ban iai bteng ban leh ia ki, aipateng bad ban lehkmen.
“Kane kan ym long tang ka jingtei hynrei ka nongrim jong jingialeh ban pynim ia ka kolshor-ka jaka kaba ka jingithuh kyrpang jong ngi, ka jinglehniam, ka jingngeit bad ka rukom im la tyngkai na ka bynta ki pateng ban wan” ong u Myntri Rangbah haba ai jingkren.
“La palat spah snem, kiba bun ki jinglehniam kiba kongsan la ju leh ha ki jaka madan khlem ki jingtei kiba biang. Ngi la pynbeit mynta ia kane da ka jingkur jingmut kaba phalang ia ka jinglong kongsan ka kolshor ha ki briew jong ngi” ula bynrap.
Haba kren halor ka jingkongsan ban kyntiew ban pynneh pynsah ia ki jingleh tynrai ki riewlum trai mukul, ula ong “Haba ngi kren halor ka jingpynneh ia ka kolshor, ka rukom im, bad ka histori jong ngi, ngi iakren shaphang ki jingiada ia ka jing long tynrai jong ngi kum ka Jaidbynriew. Ki riti dustur jong ngi, ki jinglehniam, ka ktien thylliej bad ki jingngeit- kim dei tang ki jingbuh kynmaw jong ka mynnor hynrei ki dei ki jingpynpaw ba im jong ka snap kyrpang jong ngi”.
Haba pynpaw ba ki Jaidbynriew riewlum ka thain Shatei Lam Mihngi ki long kiba kyrpang bad kiba iapher ha kiba bun ki bynta, u Myntri Rangbah ula ong “Ngim pat shym la lah ban buh jingthoh ia ka histori jong ngi, ia ka jingngeit jong ngi bad ia ka kolshor jong ngi. Lyngba ka Chief Ministry Research Fellowship (CMRF), ka Sorkar kala pynshlur ia ki kam wad bniah, khnang ba ia ka riti dustur bad ka histori jong ngi yn lah ban iada bad pynneh pynsah”.
Haba pynpaw ia ka jingkyrmen ba ka Centre kan dei ka jaka ban ai jinghikai bad ban iasam ia ki jingtip, ula ong “Ka Centre ka dei ban pyni bad ia ka kolshor ba riewspah jong ngi sha ka pyrthei bad kumjuh ban pynlah ia ki samla jong ngi ba kin ioh jinghikai na ki Rangbah, ki scholar kiba lah ban iasam ia ka jingstad bad jingtip jong ki bad ka pateng ba bud”.
Kiba la iadonlang ha kane ka sngi ki kynthup ia u Symbud Myntri Rangbah Bah Prestone Tynsong, u Myntri ka Tnad Arts & Culture Bah Paul Lyngdoh, ki nongialam ka Seng Khasi bad kiwei kiwei.
