Shillong, Nohprah 18 : U Myntri Rangbah Duh ka Ri Narendra Modi hynne ka sngi U Blei, ula buh mawnongrim bad plie ia kiba bun ki project kiba shongdor palat T. 2,450 klur ha Shillong.
Kine ki project ki kynthup ia ka otribon ia ki 320 tylli kiba la dep bad 890 tylli ki 4G mobile tower kiba dang iaid, ka campus thymmai ka IIM Shillong ha Umsawli, ka Shillong – Diengpasoh ka ban pynaram ia ka leit ka wan sha New Shillong Sattellite Township bad saw tylli ki project surok ha ki lai tylli ki Jylla kata ha Meghalaya, Manipur bad Arunachal Pradesh.
U Myntri Rangbah ula plier uh ia ka Spawn Laboratory ha Mushroom Development Center bad ka Integrated Beekeeping Development Centre ha Meghalaya bad 21 tylli ki Hindi libraries ha Mizoram, Manipur, Tripura bad Assam.
U Myntri Rangbah Duh ula buh mawnongrim ruh ia hynriew tylli ki project shna surok kiba pyntrei ha Assam, Meghalaya, Manipur, Mizoram bad ka Tripura. Ula buh mawnongrim ruh ia ka Integrated Hospitality and Convention Centre ha Tura bad ka Shillong Technology Park Phase -II.
Haba kren ha ka jingialang, u Myntri Rangbah Duh ula pynpaw ba ka Meghalaya ka dei ka Jylla kaba don riewspah ha ka spah mariang bad ka deiriti bad kane kala paw na ka rukom pdiang burom da ki briew.
U Myntri Rangbah Duh ula khring ia ka jingmut jingpyrkhat jong baroh ba kane ka jingialang ba hynne ka sngi kala long ha madan phutbol ha ka por ba ka world cup phutbol ka dang iaid shakhmat. “Ha kawei ka liang, ka lympung ialehkai phutbol ka dang iaid hynrei hangne ngi la tam shakhmat ia ka jingiakhun ia ki kam pynroi ha ka madan phutbol”.
Haba shim nuksa ia ka jingai red card ha madan phutbol ia ki briew kiba iaid pyrshah ia ka mynsiem ialehkai, u Myntri Rangbah Duh ula ong ba ka Sorkar kala ai red card ia baroh ki jingeh kiba wan kah ha lynti ka roi ka par jong ka thain Shatei Lam Mihngi. “La ka dei ka bamsap, ka jingibein, ka jingumsnam lane ka vote-bank politics ban pynthut ia ka roi ka par ha ka thain. Ngi la trei naduh ka mynsiem bad ka jingaiti ban ratdyngkhong ia baroh kine ki jingsniew” ula ong.
U Myntri Rangbah Duh ula kdew ba watla kine ki jingsniew kila suhthied bha, ngi hap ban trei ha kaban ratdyngkhong ia baroh na ki. Ula bynrap ba ka jingtrei shitom jong ka sorkar kala pyni ia u soh.
Haba pyntip ia ka jingshimkhia ka Sorkar ban pynroi ia ki kam ialehkai, u Myntri Rangbah Duh ula kdew ba ka Sorkar Pdeng kala jam shakhmat da ka lynti ba thymmai bad ki jingmyntoi kiba lah ban iohi ha ka thain Shatei Lam Mihngi ruh kumjuh. U pyntip ba nalor ka Sports University ba nyngkong eh ka Ri India, ka thain kan ioh ruh ia shibun ki jingtei kum ki multipurpose hall, madan phutbol bad ki athletics track. Ula bynrap ba ka kam kala iaid shakhmat ban pytrei ia 90 tylli ki project ba kum kine hapoh ka thain.
U Myntri Rangbah Duh ula ong da ka jingkular ba watla ngi la khmih ia ki Kynhun ialehkai jong ki Ri ka pyrthei ba ialehkai ha ka World Cup ha Qatar, u ngeit skhem pat ba ha ka bor jong ki samla bad pynpaw ba ka sngi kam slem shuh ba ka India kan lah ban pynlong ia kum kane ka lympung ialehkai bad baroh ki Nong India kin sa iarisa iala ka jong ka Kynhun ka ban iashimbynta ha ka.
