Shillong, K’lyngkot 11 : U Myntri Rangbah ka Jylla Conrad K Sangma hynne ka sngi Balang, ula buh jingkylli ia ka jingbym lah jong ka Sorkar MUA ba ialam da u Dr Mukul Sangma ban leh eiei halor ka jingbym iohkam ki samla ka Jylla bad ong ba ka jingphong ia ka jersey ka AITC kan ym pynklet ia ki paidbah ba ki dei ki juh ki nongialehkai.
U Conrad ula kynthoh ia kane halor ka jingkular ba dang shen jong ka All India Trinamool Congress (AITC) ban aikam ia palat 3 lak ngut ki samla khlem kam lad aka shah jied ban wan ha ka bor hadien ka elekshon ban wan.
“Lada ki mut shisha, kila dei ban leh naduh ka sorkar kaba rim haba ki dang don ha ka bor hynrei ki khlem shim satia ia kano kano ka sienjam lane leh eiei” ong u Conrad haba iakren bad ki nongthoh khubor.
U ong ba kito kiba don ha ka Sorkar Congress (MUA) kila phong ia ka jersey thymmai da kaba leit iasoh bad ka AITC.
“Ki juh ki nongialehkai ki phong da ka jersey thymmai bad kam ba ki dang thymmai. Nga tharai phra snem ki paidbah ka Jylla kila iohi iaka kam ba ki trei bad kumno ka ioh ka kot bad ka jingeh ba ki mad” ong u Myntri Rangbah.
U Conrad uba dei ruh u National President ka National Peoples’ Party (NPP), ula kynnoh ba ka Sorkar Congress ba ialam da u Dr Mukul kam shym la lah ban pynioh pisa ban pyndep ia kiba bun ki project, wat ia ki project ba kila dep ban buh mawnongrim bad dep sdang ruh ia ka jingtrei.
“Hynrei kane ka Sorkar kala lah ban pyndep lut ia kitei ki project. Ka nuksa bar it eh ka dei ka Ampati Water Supply Scheme bad lada phi peit ia ka hadien bala mang tyngka, ka sorkar barim kala pyllait tang T.5 haduh T. 10 klur hynrei kane ka Sorkar ba mynta watla ka dei ka Constituency kaba mihkhmat da ki dkhot na Liang Pyrshah, kala shimkhia ia ka jingeh ki paidbah ka Ampati bad theh haduh T.100 klur duna sha kane ka project” ula ong.
“Namar kata, ka long kaba sngewthuh ba ki klet iala ka jong ka por bad tang namar ba kila phong ia ka jersey thymmai, ki sngew ba ki paidbah kin klet ba kim shym la lah ban leh ia ki kam bad ban ai ka jingshakri ha katei ka por bad dei namar kane ka daw ba ki paidbah kila kyrshan iaka jingkylla” ula bynrap.
U Myntri Rangbah ula ong ruh ba ki paidbah kila iohi mynta ia ka jingiaid shakhmat ka Jylla naba ka Sorkar kala wanrah ia ki prokram bapher bapher ban iarap ia ki nongrep, ki seng longkmie, ki SHG bad kiwei kiwei ha kaba la lah ban aikam aijam ia ki nongshongshnong.
“Namar kata, ban shu kren hi kam don jingmut eiei ruh em…baroh ki lah ban kren hynrei ka kam ka dei kaba kren dalade” ula ong.
