Buh jingkylli ka MITCRM ba thmu siew tulop ia ki ADC | Syier ioh pyntrei ia ka Panchayati Raj

Shillong Nailur 08: Ka Meghalaya Indigenous Tribes Constitutional Rights Movement (MITCRM) kala buh jingkylli la ka jingthmu ka sorkar jylla ban siew tulop ia ki nongtrei ki 3 tylli ki Autonomous District Council (ADC) kan ym plie lad ban pynjari ia ka Panchayati Raj System hapoh ka jylla Meghalaya.

Kane kadei kawei na ki mat, kaba ka MITCRM kala pan jingpynshai na ka sorkar jylla hapoh jong ka 15 sngi.

Ha ka shithi kaba la phah sha u Myntri Rangbah ka jylla u Conrad K Sangma ha ka sngi Nyngkong, ka MITCRM kala ong, “Ngi kyrpad ban ai ia ki jingtip kiba bniah ia kitei ki mat katkum ka jinglah ka jong phi ban leh kham kloi, kaba mut hapoh jong ka 15 sngi, ban ailad ia ngi ban pyntip bad pynthikna ia ki jaidbynriew ki jong ngi. Ka MITCRM ka long kaba kloi ban iakren ne shong jingialang ban shimkhia halor kane ka mat”.

“Kumno ka sorkar jylla kan pynthikna ba kane ka jingai jingiarap kan ym plie lynti ban pynjari ia ka Panchayati Raj ha Meghalaya, kaban pynduh noh ia ka rukom synshar tynrai kaba la don lypa?” kala kylli bad ka banjur ia ka jingdonkam ban iada ia ka hok bad ia ka kolshor ba kyrpang jong ki Khasi, Jaintia, Garo bad kiwei pat ki jaidbynriew tynrai.

Ka MITCRM kala buh jingkylli ruh ia ka rukom shim ia katei ka rai halor ka jingtyrwa jong ka sorkar, da kaba pynpaw ba kam shim la don ka jingiasyllok bad baroh kiba donbynta lang ha ka kam, kynthup ia ki dkhot bad ki nongmihkhmat jong ki ADC.

Ka seng kala pynpaw ia ka jingsngewkhia ba katei ka jingtyrwa ka lah ban pynduh bor ia ki District Council bad ia ka rukom synshar dalade kaba la pynkup bor katkum ka Sixth Schedule jong ka riti synshar ka ri, khamtam eh ha kaban lam sha ka kyntiew ia ka bor jong ka sorkar jylla halor jongki ADC.

Ka MITCRM kala pan jingpynshai ba kumno ka jinglum khajna da ki ADC la bhah bad kumno ia ka jingkyrshan pisa yn pynwandur ban pynneh ia ka jingkhuid jingsuba bad bad iada na ka jingshah pyndonkam bakla.

“Shaei ka khajna kaba la lum mynta da ki ADC (nuksa na ki khyrdop, khajna bad kiwei pat ki tyllong) la bhah, khamtam haba ka paw ba ka don ka jingbym dap ban pynbiang ia ki jingdonkam kum ka jingsiew tulop ia ki nongtrei? Lada kadei ka jingthmu ban ai jingiarap da ka pisa, iano yn ai, la kadei ia ki MDC, ki nongtrei jong ki District Council, ne ia ki Council kum ki bor treikam? Ngi kyrpad ban ai ka jingpynshai kaba shai kdar halor kane ka bynta, ba kumno yn pynwandur ban pynneh ia ka jingkhuid jingsuba, ban iada na ka jingpyndonkam bakla bad ban pynthikna ba kan ym niewpoh noh ia ki ADC kiba la treikam ban pynneh pynsah ialade naduh ba la seng ha u snem1952,” kala pynpaw.