Shillong, Rymphang 03: Ka BJP-Meghalaya ha ka sngi Saitjain, kala buh jingkylli ia ka rai jong ka Sorkar Jylla ban pynjlan ia ka samoi treikam jong ki artylli ki Autonomous District Council (ADC) –ka KHADC bad JHADC sa hynriew bnai.
U Nongaiktien ka BJP Bah M H Kharkrang haba iakren bad ki nongthoh khubor ula ong ba ka Sorkar ka dei ban don ia ka daw kaba biang ban pynjlan ia ka samoi treikam jong ka KHADC bad JHADC.
“Ka Sorkar kan hap ban batai ia kaei ka jingjia ba kyrkieh lane jingdonkam kyrkieh ba hap ban pynjlan ia ka samoi treikam jong kine ki artylli ki ADC” ula ong.
“Phim lah ban pynjlan ia ka samoi ki Council tang ha ki nongrim ba kumne kumtai. Ka dei ban don ia katto katne ki daw kiba biang. Namar kata, ngi ieh ha ka Sorkar ba kan kren shai halor kane” ong u Bah Kharkrang.
Ka Kynhun Myntri ka Sorkar Jylla ha ka sngi Thohdieng kala mynjur ia ka jingtyrwa ban pynjlan ia ka samoi treikam jong ki artylli ki ADC hadien ba ki Delimitation Committee kila pan por ban pyndep ia ka jingbishar phiah constituency hapoh kine ki artylli ki Council.
Haba kylli, u Bah Kharkrang ula ong “Lada ka Sorkar ka sngew ba ngi la poi ha u khep ba donkam kyrkieh ha kaba ngi hap ban pyndep ia ka jingphiah constituency shwa ba ngin iaid sha ka elekshon thymmai, ka Sorkar kan hap ban kren shai halor kaei kata ka jingdonkam kyrkieh ha kane ka bynta”.
Une u Heh BJP ula kynnoh ruh ba ia kine ki Delimitation Committee la thaw la slem bha hynrei kam shym la paw kam satia. “Shu khein ba lada phim pyndep hapoh ka hynriew bnai, kaei ka ban jia, phin pynjlan biang?” ula kylli.
 –ka KHADC bad JHADC sa hynriew bnai.){kind=link}