Guwahati, Rymphang 17: Hynne ka step jong ka sngi Saitjaiñ uwei u Pipe Um uba don ha Bhangagarh jong ka nongbah Guwahati ula bthei kynsan bad ka um kaba mih na une u pipe kala pynthud ia ka leit ka wan jong ki paidbah.
Kane ka jingjia kala jia ha ka por mysntep bad kala pynthud iaka leit ka wan jong ki paidbah na katei ka jaka, kaba ki briew ki bunkam bha bad ki video kila saphriang haba ka um kaba khlain bha kala mih bad shlei ha ka surok baroh kawei.
Ka jingbthei jong utei u pipe um ban pynpoi iaka umbam umdih sha ki iing briew, kala pynshlei um ia ki surok ha Bhangagarh ia katto katne por, hynrei la lah ban weng noh ia katei ka jingeh da ka jingshimkhia mardor da ki nongtrei jong ka Guwahati Metropolitan Development Authority (GMDA) bad ki ophisar jong katei ka tnad.
Ha ki jingjia kiba la dep, ka jingbthei ki pipe um kala pynmih iaka jingeh kaba khraw naka bynta ki nongshong shnong bad katto katne ki jaka sah kila shah pynjulor na ka jingshlei um ha ka thaiñ.
Ha kawei na ki jingjia, u Pipe Um ha Guwahati Jal Board ula bthei ha ka 11 tarik u Jylliew bad kala pynmih ia ka jingshlei um ha Rajgarh, Assam. Na ka liang jong ki nongshong shnong kila kynthoh bad kynnoh pyrshah iaka GMDA halor katei ka jingjia.
Ha u snem ba la dep, kawei ka longkmie kala khlad noh bad palat 30 ngut ki briew kila mynsaw haba u pipe um jong ka Municipal ula bthei kynsan hapoh nongbah Guwahati bad katei ka um kaba khlain bha kala pynjulor ruh ia kumba 40 tylli ki iingsah ha ka thaiñ Kharguli kaba don ha ka nongbah.
