Kochi, Risaw 29 : U bomb IED ula bthei hynne ka step sngi U Blei hapoh ka Iingmane jong ka Jehovah Witnesses Church kaba don ha Kalamassery, Kerela, uba la shim ia kawei ka mynsiem bad pynmynsaw ia bun ngut ki riewngeit jong kane ka Balang.
Kat kum ki khubor, kane ka jingbthei bomb kala jia hapdeng jong ka jingialang Duwai jong ki riewngeit kiba don kumba 2500 ngut eiei. Kane kala jia ha ka por 9:40 baje mynstep.
Kat kum ki khubor ba mih ha ki National Media, la ong ba kane ka jingjia kala jia ruh tang hadien shisngi ba u Nongialam barim ki Hamas Khaled Mashal, ula ai jingkren lyngba ki kor online ha ka jingialang ha Maluppuram, North Kerela ha kaba ula bhah ia ki kynhun Jaimait-e-Islami ba kin leh eiei pyrshah ki briew ki bym ngeit Muslim.
Ka Sorkar kala phah ia ka kynhun bor pahara ba iakhun kam lehnoh bad ka National Security Guard (NSG) sha kane ka Iingmane ban pynlong ia ka jingtohkit.
La iathuh ba ha kane ka jingbthei bomb, kawei ka Longkmie kala iap bad 23 ngut kiwei pat kila mynsaw.
Kat kum ka jingshem na ka jingtohkit ba malu mala la ong ba une u bomb ba bthei um dei satia uba khlain bor. Ki kynhun tohkit kila pynthitna ba une u bomb u dei uba shu buh da ka por namar ka jingbym don dak satia ban don ki battery ne ki wire na kane ka jaka.
La suba jur ba kane ka kam pyntriem ka dei ka kam jong ki lehnoh Muslim namar ki kam pyntriem jong kine ki lehnoh kynthup ka PFI ha ki snem bala leit noh ha ka thain Kalamassery.
Halor kane ka jingjia, u Myntri Rangbah ka Kerela Pinarayi Vijayan ula ong “Ka dei ka jingjia kaba sngewsih. Ngi dang lum ia ki jingtip halor kane ka jingjia. Baroh ki heh Sorkar kila don ha Ernakulan bad u DGP ruh ula leit sha kane ka jaka. Ngi la shimkhia bha ia kane ka jingjia. Ka jingtohkit kala iaid shakhmat ban lap iaki briew ba donkti”.
