Shillong, Lber 24 : U Myntri ka Tnad Pule Puthi Rakkam A Sangma ha ka sngi Nyngkong, ula shong bishar kam halor ki project tei iingskul ba dang sahteng ha kylleng ki jaka ka Jylla bad bthah ba dei ban pyndep kloi noh ia ki.
Haba iakren bad ki nongthoh khubor hadien ka jingialang, u Rakkam ula ong “Ngi la shong bishar kam ia baroh ki project ba sahteng. Ngi la byhah ia ki Ophisar bad ki agency ba pyntrei ba kin pynkloi noh bad pynthikna ba kin dep noh mar mar”.
Kine ki project ba dang sahteng ki kynthup ia ka jingtei jong ka Science & Commerce College ha Mawphlang, Mahendragrank, Patharkhmah, Rongjeng, DIET ha Williamnagar bad Polytechnic ha ki District kum ka South Garo Hills, West Jaintia Hills, West Khasi Hills, East Garo Hills bad Ri-Bhoi.
Kat kum ka jingong u Myntri, ki don ki daw bapher bapher halor ka jingslem bad katto katne ki dei namar ka jingslem ban pyntrei na ka liang ki contractor bad don ruh namar ka kam jaka puta.
“Ki jingpyrshang kila iaid shaid shaid ban pynbeit noh ia baroh kine ki jingeh ba iakynduh” ula kular.
Nalor kane, u Rakkam ula pyntip ba na ki 38 tylli ki Eklavya Model Residential Schools (EMRS), lai tylli – Mawkynrew, Khararshnong, Laitkor bad Rongra – ki iakynduh jingeh ha ka jaka ia kaba la bthah ia ki Deputy Commissioner bad ki Block Development Officer (BDO) ba kin iakren bad ki trai jaka bad ban pynbeit noh kham kloi ia ka kam.
Kumjuh ruh, 13 tylli ki EMRS kila don ha ki kyrdan bapher bapher jong ka jingpyntrei bad 16 tylli kila don ha ka kam ban khot tender ia kaba ka sngi ba khatduh la buh ban long ha ka 25 tarik Lber bad 7 tylli ki dang don ha ka jingpynkhreh ia ki kot ki sla.
“Hashuwa kane, ia ka kam la aiti sha kawei ka agency na Manipur (ha u 2019-20) hynrei ka Sorkar Jylla kala thoh sha ka Ministry bad ka Ministry kala ai biang ia ka kam sha ka Sorkar Jylla ba kan pyntrei ia ki EMRS” ula ong.
Hapoh ka Mission Education, u Myntri u pyntip ba 1608 tylli ki skul kila ioh ia ka mang tyngka ban tei pynbha ia ki iingskul.
“Ha kiba bun ki district ( ka jingtei pynbha ia ki skul) kila dep hynrei sngewsih ban ong ba katto katne ki jaka kum ka Mawsynram, Mylliem (EKH), bad Khliehriat (EJH), Amlarem (WJH), Umsning (Ri-Bhoi) Mawthadraishan (EWKH)-ki kam kin dang ban sdang bad ngi la shong bishar ia kane hynne ka sngi” ula bynrap.
