Shillong, Risaw 26 : U Symbud Myntri Rangbah ka Jylla Bah Prestone Tynsong ha ka sngi Palei, ula pyntip ba ula bthah ia u Chief Secretary ka Jylla Bah DP Wahlang, ba un iakren bad ka Sorkar Assam halor ka jingkylla ka Byrnihat kum ka jaka sor ba jaboh tam hapoh ka Ri India.
Ka Central Pollution Control Board, ha ka sngi Balang kala pyllait ia ka kaiphod kaba pyni ia ka jingjaboh ka lyer ha kylleng ki jaka sor ka Ri bad hangne ka Byrnihat, Meghalaya ruh kala paw ba ka dei kaba jaboh tam hapoh ka Ri India.
Kat kum ka Air Quality Index (AQI) bala pyllait da ka Central Pollution Control Board, ka Byrnihat kala kynjoh ia ka AQI ba kot 302, kaba pyni ba ka dei kaba jaboh tam na ki jaka sor hapoh ka Ri.
Hadien ka Byrnihat, kiwei pat kiba bud ki dei ka Hanumangarh (297), Greater Noida (278), Faridabad (270), Manesar (251), Bahadurgarh (247), Delhi (243), Meerut (240), Ballabgarh (234) bad kiwei kiwei.
“Haba phai hi sha Byrnihat, ka bynta sha ka diang haba leit sha Guwahati ka dei jong ka Meghalaya bad ka bynta sha ka mon ka dei jong ka Assam. Nga tharai phi lah iohi ia ka jingmih bun ki karkhana sha ka bynta ka mon katba sha ka bynta ka diang, ki don tang ki karkhana bala buh ha ka Industrial Estate kiba la peit thuh da ka MSPCB” ong u Bah Prestone.
“Hynrei haba phai sha ka bynta ka Assam, nga la bthah ia u Chief Secretary ba un iakren bad ka Assam ban wad ia ki lad ki lynti ba kumno un peit thuh bad tehlakam ia ka jingpynjaboh namar ngi hi nangne ngim lah ban leit thew ia ka jingpynmih jaboh jong kine ki karkhana ba don ha Assam” ula bynrap.
