Bthah u DyCM ia ka NHIDCL ban buh ‘jingthoh dak’ ha ki jaka riat ka surok Pynursla

Shillong, Nailar 04 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ula bthah ia ka National Highways and Infrastructure Development Corporation Limited (NHIDCL) bad ka kompani ba pyntrei ia ka project ba kin buh jingthoh dak (sinages) ba thikna ha ki jaka ba don jingma ha shilynter ka surok sha Pynursla.

U Bah Prestone ula shong bishar kam halor ka jingshngain jong ka surok hadien ka jingjia hap kali shapoh ka riat Rngain, kaba shim ia 5 ngut ki mynsiem briew na kajuh ka Longiing ha ka miet sngi U Blei.

Haba phah ia ka jingsngewlem sha ki bahaiing hasem ki lanot, u Symbud Myntri Rangbah ula ong ba kane ka jingjia ka lah ban jia lehse namar ka daw ba u nongniah u pyrshang ban knieh tam shakhmat ia kawei ka trok ha kane ka thain kaba jur u lyoh khyndew.

Kat kum ka jingong jong u, ka jingtohkit kala iaid mynta ban pynthikna ia ki daw tynrai halor kane ka jingjia.

U Bah Prestone u pyntip ba ula lum ia ka jingialang bad ka kompani ba pyntrei ia ka project lem bad ka NHIDCL ban iakren halor ki lad ki lynti ban wanrah ia ka jingshngain ki nongleit nongwan ha kane ka surok.

“Ka jingialang jong nga bad ka kompani lem bad ka NHIDCL ka long ban pynthikna ba ia ki jingbuh jingthoh dak (sinages) dei ban buh bha ha ki jaka kiba don jingma kat kum ka jingiohi ia ka jingdonkam” ula ong.

Ula bynrap ba u Chief Engineer ka PWD (National Highway) ruh ula pynbeit ban leit jurip ia ki jaka kiba idon jingma ban pynthikna ia ka jingbuh bha ha ki jaka kiba dei ia ki jingbuh jingthoh dak (sinage).

Haba kylli la kan don ka jingiarap song pisa sha ki nongioh bynta jong kine ki lanot, u Bah Prestone ula ong ba ka jingtohkit ia kane ka jingjia ka dang iaid mynta bad ula dep bthah ia u SDO Civil ban aiti ia ka kaiphod, ka ban sa batai ia kaei ka sienjam ba ngin shim haba iadei bad ka jingiarap song pisa.

“Peit haba iadei bad ka jingai jingiarap song pisa, Ngam pat lah ban ong eiei ia mynta namar ia mynta, nga la bthah ia u SDO Civil ban aiti ia ka kaiphod. Ai ba ka kaiphod ban wan namar kumba nga ong ba phim lah ban tip la ka dei ka jingbakla jong u nongniah ne ka jingbakla jong ka kompani ba pyntrei ia ka surok” ula ong bad bynrap “Nga pynpaw ia ka jingsngewsih bad jingsngewlem sha ka longiing kaba mad ia kane ka jingjia ba sngewsih. Jan baroh ki dkhot ka Longiing kila iap ha kane ka jingjia. Namar kata, nga kyrpad…to ngin ia ap tad hadien bala aiti ia ka kaiphod sha ngi bad ngin sa peit ia kaei kaba dei ban leh”.

U Bah Prestone ula ban jur ba ka jingshngain ha ka leit ka wan ha ki surok ka dei ka kam kaba la buh hakhmat eh bad ki bor khmih kila shim ia ki lad ki lynti ban khanglad ia kum kine ki jingjia ba kin nang jia hadien habud.

Halor ki ejahar bala mudui halor ki jingjia kia jia hapoh ka thain Riat Rngain ha ki por bala leit noh, u DyCM ula ong “Ha ka jingshisha, phim lah ban ianujor ia ki jingjia ha ki por bala leit bad ka jingjia kaba la jia hynnin ka miet”.