Shillong, Jylliew 20: U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong ula pyntip ba ka sorkar jylla kala dep bthah iaka Director General of Police (DGP) bad ia u Superintendent of Police (SP) ka East Jaintia Hills ban shimkhia mardor da kaba iaid katkum ka aiñ pyrshah ia ki shipai BSF kiba leh iaka kam thombor ha Kuliang.
“Nga lah bthah ia ka DGP bad SP ka EJH ban shimkhia mardor halor ka jingleh khlieh biej ki BSF ha Kuliang. Ka jingbym phong uniphom ki BSF ka pyni ba kim shym la don ha ka kam (Duty) bad ka rukom rung ka jongki ka long kaba aratatien bad kala pynkhih win iaka shnong ka thaw baroh kawei” ong u Bah Prestone Tynsong.
U DyCM ula pyntip ba ka sorkar kala dep bthah ia ka DGP bad SP ban pynthikna ka ka aiñ kadei ban iaid kumba kadei ban iaid bad lada dei ban kem ruh dei ban kem ia ki BSF.
“Kum kitei ki jait jingleh kiba la iaid palat pud ia ki aiñ ki kanun, dei ban ai ka jingpynshitom katkum ka aiñ” ula ong.
Haba kylli ba kane ka jingleh donbor ki BSF kam dei kaba jia tang mynta ka kynti hynrei ka jingleh donbor ki BSF kala iai bteng man la ka por ha khappud, u Bah Prestone ula ong ba “Ha ki bnai kiba la dep, ka Sorkar kala thaw ia ka Committee kaba khlieh da ki Deputy Commissioner (DC) ne ki Sub Divisional Officer (SDO) jong ki Civil Sub Division katkum ka thaiñ ka jongki. Ka kamram jong ka Commiteee ka long ban kynthup lang ia ki nongsynshar shnong, ki BSF, ki Ophisar na ki tnad bapher bapher naka bynta ka jingshongsuk bad wanrah ia ka jingiadei ba iajan hapdeng ki BSF, Custom, Pulit ne ki ophis sorkar ba kan don ka jingiatreilang kaba iajan bha bad lada ka don kano kano ka jingiasngewthuh bakla ne kano kano ka ishu, kin iapynbeit ia katei ka jingeh ha katei ka Committee khlem da donkam ban wanrah sha ka sorkar”.
Ula ong, ba lada don pat ki ishu ba ki Committee kim lah ban pynbeit hapdeng jongki, kin sa wanrah sha ka sorkar.
U Bah Prestone ula ong, ba ka ain kadei ban leh ia kaba donkam pyrshah ia ki BSF namar ba kila leit rung hapoh ka iing khlem da phong iaki uniphom kaba pyni ba kim don haka duty. Ula ong ba kane ka mut ba kadei kaba be-aiñ ban leit khlem da phong uniphom bad ka DGP bad u SP kidei ban leh ia kaba donkam.
 Bah Prestone Tynsong ula pyntip ba ka sorkar jylla kala dep bthah iaka Director General of Police (DGP) bad ia u Superintendent of Police (SP) ka East Jaintia Hills ban shimkhia mardor da kaba iaid katkum ka aiñ pyrshah ia ki shipai BSF kiba leh iaka kam thombor ha Kuliang.){kind=link}