Shillong, Jymmang 15 : U Symbud Myntri Rangbah ka Jylla Bah Sniawbhalang Dhar, ula bthah ha kaban thaw mar mar ia ka “Peace Committee” ban wanrah pat ka jingshongsuk shongsain ha ka Shnong Khanduli, West Jaintia Hills District.
“Nga la bthah ia u Deputy Commissioner ka West Jaintia Hills ban thaw ia ka Peace Committee namar balei ba kine ki ar Jaidbynriew (Khasi-Pnar bad Karbi) kin dang bteng ban ialeh mar pyrshah na ka por sha ka por” ong u Bah Sniawbha haba iakren bad ki nongthoh khubor.
U Bah Sniawbha u pyntip ba u Deputy Commissioner ka West Jaintia Jills un sa iashong jingialang bad u Deputy Commissioner ka West Karbi Anglong District lashai ka sngi bad une sa ban jur halor ka jingthaw ia ka Peace Committee.
Kat kum ka jingong jong u, kumba long mynta, ka jinglong jingman kala jai jai bad ym shym la don shuh kano kano ka huri hura mynta ha ka thain.
“Ngi la kyrpad ruh ia ki paidbah na baroh arliang mamla ba kin nym ia pyndom pynshrai markylliang” ong u Bah Sniawbha.
Haba kylli, u Symbud Myntri Rangbah ula ong ba ki paidbah kila pyrshah ia ka jingpynieng khyrdop lum khajna na ka liang ka Assam ha Khanduli.
“Ngin sa rah iakren ruh ia kane ka kam ha ka kyrdan jong ki Myntri Rangbah ka Jylla” ula bynrap.
Ha ka sngi Palei jong ka taiew bala lah, ka jingkulmar kala mih hapdeng ki Khasi-Pnar bad ki Karbi ha ka shnong Khanduli. Ki Nongshongshnong kila pyrshah ban pynieng ia ka khyrdop lum khajna da ka Karbi Anglong Autonomous Council.
Kane ka huri hura kala mih hadien ba ka Dorbar Shnong jong ka Khanduli kala rai ban pyrrkhing ia ki briew na ka Jaidbynriew Karbi ban iaid lyngba ka shnong.
Kane ka rai jong ka Dorbar Shnong kala mih hadien ba ki karbi kila byrngem ia ki Nongshongshnong Khasi-Pnar ba kin leit sha ki jaka rep.
Kane ka jingkulmar kala poi sha u pud ka jingialum maw bad iashoh iadat bad artylli ki sem kila shah wiang ding.
Ha kane ka jingjia, ka kali jong u Superintendent of Police ka West Jaintia Hills ruh kala shah lun maw. Hynrei u SP ula lait phet da ka said khlem kano kano ka jingmynsaw lait nothing ka kali kaba la julor malu mala.
