Shillong, Rymphang 05: U Symbud Myntri Rangbah ka Jylla ba khmih ia ka kam pynroi sor Bah Sniawbhalang Dhar ula pyntip ba ula bthah ia u Director ka Tnad pynroi sor ban ai ia ka phone nombor jong u briew ba suba shah tep im ha Marten sha ki Pulit ba kin lah pynthikna shano ba u don ha ka por ba don ka jingtwa jong ki niut ha kane ka jaka bret niut.
“Nga la bthah ia u Director ka Tnad Urban Affairs ban ai ia u nombor phone jong u briew ba jah sha ki Pulit khnang ba kin lah ban buddien shano ba u don ha ka por ba twa ki niut” ula ong.
Haba iakren bad ki nongthoh khubor, u Bah Sniawbhalang Dhar ula pyntip ba haduh mynta ym pat lapdien satia ia une u briew ba jah.
“Ngin dang ban pynthikna la ka met ka don ne em hangtei. Ki bahaiing hasem jong une u briew kila kyrpad ia ngi ba ngin pyrshah iawad biang iaka biang..ngi la mynjur ia kane” ula ong.
Haba kylli, u Symbud Myntri Rangbah ula ong “Ngi kulmar jingmut mynta la une u briew u shah tap shisha ne em ha u niut namar haduh mynta ka sngi ngim lap satia ia ka met”.
“Ki ophisar jong nga bad ki nongtrei kin iawad biang lashai ka sngi bad ngin iatreilang bad ki bahaiing hasem jong une u briew ba jah” ula ong haba bynrap “Ngim lah ban pynthikna la kane ka jingjia ka jia shisha ne em namar ym don ba iohi satia ha ka por ba jia”.
“Ki shu iathuh ba u ju wan shatei man ka sngi ban lum marjot. Ngim lah ban ong eiei. Sngewbha iai shah bad ki Ophisar jong ngi kiba la trei shitom ban wad la kane ka jingjia ka jia shisha ne em” ong u Bah Sniawbha.
Lah ban kdew ba ka kynhun SDRF bad ki Pulit kila hap ban pynsangeh noh hynne shiteng sngi ia ka jingwad ia u nongtam marjor ba suba shah tep im ha marten namar ka jingdum palat ka bneng, ong ki heh Sorkar.
“Ka jingiawad ia une u briew kan sdang biang lashai mynta ha ka por 9 baje” kila ong.
