Shillong, Jylliew 13: U Myntri Rangbah ka Jylla u Conrad K Sangma hynne ka sngi u la ong ba ki tnat treikam Sorkar ki dei ban iamir jingmut bad iatreilang naka bynta ka roi ka par jong ki nongshongshnong kaba neh bad kaba kynthup lang ia baroh.
“Ngi ju trei khlem shongthait miet la bad sngi, hynrei khlem ka thong kaba shai, ngi ioh kheit u soh ka jingjop tang khyndiat. Dei na kata ka daw ba ka jingbuh ïa ki thong kiba la batai, kiba lah ban shim jingkheiñ ka long kaba kongsan bha. Ka District Nutrition Challenge kadei naka bynta ban pynbha iaka jingim ki longkmie bad ki khunlung” la ong u Conrad ha ka jingialang kaba ar sngi ha ka District Nutrition Leadership Workshop.
“Ngi dei ban pynleit jingmut ha ki thong jong ngi, hynrei kaba kham kongsan ka long ha ka jingthmu kaba don ha lyndet jong kita ki thong” u la ong.
Haba pynkynmaw biang ïa ka jingkular jong ka Sorkar ban kyntiew ïa baroh, u Conrad u la kren shaphang ka thong ban kynjoh iaka 10 billion US dollar economy ha ryngkat bad ki thong na ka bynta ka jingroi jingpar baroh kawei jong ka Jylla. “Kam dei tang shaphang 10 billion ne 10 tylli ki thong—ka dei shaphang ka jingpynkylla ia kine ki jingkhein sha ka jinglong mar ryngkat, sha ka jingbha ha ka imlang sahlang kaba lah ban iohi. Kata ka dei ka jingthmu bashisha jong ka jingsynshar” u la ong.
U Myntri Rangbah u la kren ruh halor ka jingdonkam jong ka jingsynshar kaba pynshong nongrim ha ki briew, da kaba kdew sha ka prokram CM Connect kum ka nuksa ba kongsan, “Lyngba ka CM Connect, nga la lah ban ïakynduh bad sngap beit beit ïa ki briew jong ngi. Kam dei ka jingjia—ka dei ka rukom synshar”.
“Nga kyntu iaki ophisar ban pyntreikam kum kine ki rynsan kum DC Connect bad BDO Connect ban pynjan ka synshar khaddar bad ki paidbah” u la ong.
Haba khot ia ka jingkylla ha ka rukom pyrkhat bad ka rukom treikam, u Myntri Rangbah u la ong, “Ngi tip ia ki jingeh. Kaei kaba ngi donkam mynta ka long ka jingtreikam kaba la batai shai bha—mano ban leh ia kaei, kumno yn leh, bad haduh lano. To ngin sangeh noh ban trei ha ki silo bad sdang ban trei da ka jingthmu kaba iasam lang bad ka jingkitkhlieh.”
Ha kane ka jingialang la wan ban iashim bynta da u Myntri ka tnad Social Welfare u Bah Paul Lyngdoh, u Myntri ka tnad CRD ubA T Mondal, ka myntri ka tnat ka koit ka khiah ka Kong Ampareen Lyngdoh, u myntri ka tnat Sports u Bah Shakliar Warjri ha ryngkat ki bor district na kylleng ka jylla.
Ka jingsdang jong ka District Nutrition Challenge ka dei ka sienjam kaba kongsan ban pynurlong ïa ki thong jong ka roi ka par lane ka Sustainable Development Goals (SDGs) 2030 bad ka pynskhem biang ïa ka jingangnud jong ka Meghalaya ban tei ïa ka lawei kaba koit ba khiah, kaba ïaryngkat na ka bynta baroh.
