Shillong, Naitung 24 : U Myntri Rangbah ka Jylla Conrad K Sangma ha ka sngi Palei, ula lum ia ka jingialang ki heh Ophisar bad bthah ia ki bor District bad Pulit ba kin pynjur bha ka jingpeit pyrman, khamtam ha ki jaka khappud ba iajan bad ka Assam, kaba dang pyniaid mynta ia ka jingkhynra ia ki mynder ri, khnang ban khanglad ia ka jingwan rung shapoh ka Jylla Meghalaya.
“Ka jingialang bishar kam kala long ha ka kyrdan jong nga ban iakren ia ki kam ki ban ktah na ka jingkhynra mynder ri kaba jia ha Jylla Assam bad ngi la ai ka jingbthah ban long kiba peit pyrman bha khamtam ha ki jaka khappud ba marjan ka Assam bad ki jaka kiba marjan bad ki jaka ba khynra” ong u Conrad hadien ka jingialang.
U iathuh ba la dep bthah ia baroh ki Deputy Commissoner ba kin peitngor bha ha ki jaka khappid khamtam kito kiba iajan bad ka Assam, ban khanglad ia ka jingwan rung ki briew ba shah khynra sha Jylla.
Ki bor District, ki Pulit, ki Village Defence Party (VDP) bad ki Khlieh Nongsynshar Shnong kila iatreilang mynta ban pynthikna ia ka jingsam jingtip ha ka por kaba biang bad ruh ban shim ia ki sienjam kiba donkam.
“Ka Sorkar kala iai bteng ban iakren bad ki Deputy Commissioner ban pynthikna ba ki Deputy Commissioner kin iakren ia ki BDO ha ki Block bad kumjuh ruh ki Thanad Pulit, ki VDP ha kylleng ki shnong, ki Seng bapher bapher bad ki Khlieh Nong synshar Shnong. Ia kine la leh ban pynthikna ba kan nym don ka jingioh rung ki briew ba wan phet na Assam namar ka jing shah kyndang” ong u Conrad.
U Myntri Rangbah ula pynthikna ruh ba haduh mynta kam pat don satia kano kano ka jingjia ba wan rung ki briew ba shah kyndang na Assam ha kano kano ka District ka Jylla.
“Ki don katto katne ki District kiba don jingma khamtam kiba don markhap ka Assam bad marjan ki jaka ba jia ki jingkyn dang ha Assam bad kumta, ngi la pynleit jingmut bha ha kine ki District” ula ong.
U Conrad u iathuh ba ha ka jingialang bishar kam hynne ka sngi la wan ban iashimbynta da baroh ki Ophisar kiba dei khmih ia kane ka kam.
“Kila pyntip ba ym pat don kano kano ka jingjia wan rung ki briew ha kano kano ka District bad ba baroh ki bor district, ki Pulit, ki VDP bad kiDorbar Shnong, ki Khlieh Nongsynsshar Shnong, ki Sengbhalang-kila iatreilang ban pynthikna ba kino kino ki jingjia ba ki ioh lane tip ia ka rung ka mih ki briew ba wan rung na Assam, kin pyntip mar mar sha ngi bad ngin sa leh ia ka kam kaba donkam” ula ong.
