Shillong, Iaiong 01: U Myntri Rangbah ka Jylla Conrad K Sangma, ula pyntip ba ka Sorkar kala dep bthah ia ki Deputy Commissioner jong ki District bapher bapher, ba kin pyndep lut ia ki jingai song jingiarap ia ki lanot shah lynshop eriong hapdeng 24 kynta haduh 48 kynta.
U Myntri Rangbah ula pyntip ba baroh ki Deputy Commissioner kila ioh ia ka jingbthah ba kin shim ia ki sienjam kiba donkam ha kaban iarap ia ki lanot na ka jingwan lynshop kynsan ka eriong bad u lapbah hynnin ka sngi U Blei ha kylleng ki jaka ka Jylla.
U pyntip ba ka Sorkar ha u snem bala lah, kum ka policy treikam ba thymmai, kala pynkup bor ia ki Deputy Commissioner ba kin pyntreikam ia ki song jingiarap haba don kano kano ka jinglynshop jong ki bor ka mariang.
“Kumta, ki Deputy Commissioner kim donkam shuh ban wan sha Nongbah Shillong ban ioh ia kano kano ka jingbit bad kila lah ban shim rai hi hala ka jong ka kyrdan, haba phai sha ka jingsam ia ki marbam, ki tiar ki tar ban shna iing kum ka nuksa ki CGI sheet bad kiwei kiwei”ula ong.
“Ngi la ai ka jingtreikam ba laitluid sha ki DC bad ngi la ai ruh ia ka song pisa sha ki ba kin iarap ia ki lanot” ula ong.
Ha kajuh ka por, u Myntri Rangbah u pyntip ba u Chief Secretary ka Jylla ula shong bishar kam hynne ka step halor ka jinglong jingman ha baroh kawei ka Jylla bad la aipor ia ki Deputy Commissioner ba hapdeng ka 24 kynta hduh 48 kynta la khmih lynti ba kin pyndep lut ia baroh ki jingai jingiarap.
