Donkam leh eiei ka Meghalaya-Assam ia ka jingjaboh ka lyer
Shillong, Lber 05 : U Myntri Rangbah ka Jylla Conrad K Sangma ula ban jur ia ka jingdonkam ban leh noh da kaba tyngeh pyrshah ia ki karkhana hapoh ka Jylla kiba pynkhein ia ki ain, kaba lam sha ka jingpynjaboh ia ka lyer hapoh ka Jylla.
Ula ban jur ruh ia ka jingdonkam ia ka Jylla Meghalaya bad ka Assam ba kin leh eiei noh halor ka jingjaboh ka lyer.
U Myntri Rangbah ula pynpaw ia kane haba jubab ia ka call attention motion bala wanrah da u MLA ka NPP na Jirang Bah Sosthenes Sohtun halor ka jingkhein CPCB ba pyni ia ka jingjaboh palat ka lyer ha Byrnihat.
Kat kum ka jingiathuh jong u, ka Meghalaya State Pollution Control Board (MSPCB) kala khang tala ia kiba bun ki karkhana kiba pynkhein ia ki kyndon ain.
“Nga phah ia ka khubor kaba tyngeh sha baroh ki karkhana ba ka MSPCB kala pynlong ia ka jing jurip ba khlem pyntip iano iano ruh. Nga la dep ai ka hukum ia ka MSPCB ba kan leit jurip khlem da pyntip iano iano ruh bad ban leh ia kaba donkam” ong u Conrad.
Ula pyntip ba kila don haduh 7 tylli ki karkhana kiba la shah khang khyrdep namar ka jingpynkhein ia ki kyndon ain, kaba lam sha ka jingpynjaboh ia ka mariang.
“Namar kata, ki jingjurip ba leit kynsan kynsan kin nang bteng bad haba ngi shem ia kino kino ki karkhana kiba pynkhein ia ki rule, ka Sorkar kan leh da kaba tyngeh pyrshah ia ki” ong u Conrad.
Ha kajuh ka por, u Myntri Rangbah u pyntip ba un sa thoh shithi sha u Myntri Rangbah ka Assam Himanta Biswa Sarma halor ka jingdonkam ia ki ar Jylla ba kin leh eiei halor ka jingjaboh ka lyer.
“Ki ar Jylla bad ki ar Pollution Control Board ki dei ban iatreilang bad ngi la shim ia ka sienjam ban pynurlong ia kane” ula ong.
“Hynrei, shuwa ban gin iakren ia ka Sorkar Assam, ngi hap ban leh eiei da kaba tyngeh iala ki jong ki karkhana ba don hangne kiba pynkhein ia ki ain ki kyndon bala buh” bynrap u Conrad.
Kumjuh ruh, u Myntri Rangbah ula khot ia ki Dorbar Shnong ka thain ba kin iatreilang bad ka Sorkar ha kaban tehlakam ia baroh ki kam ba wanrah ia ka jingjaboh.
