Shillong, Jymmang 06 : U Myntri Rangbah ka Jylla Conrad K Sangma ha ka sngi Nyngkong, ula bthah ia baroh ki bor District ba kin ai mardor ia ki jingiarap sha ki longiing kiba shah ktah na ka jingther u slap, ka eriong bad u phria ha ki 7 tylli ki District ka Jylla.
Palat 400 tylli ki Iing kila shah pynjulor bad palat 940 ngut ki briew kila shah ktah ha ka jingther u slap, u phria bad ka eriong ha ka sngi U Blei.
“Hynnin ka sngi namar ka jingjur ka lyer bad u slap ha ki katto katne ki bynta jong ka Jylla….hynniew tylli ki district kila shah ktah bad kumba 400 tylli ki iing kila shah pynjulor bad mar mar hi nga la bthah ia ki bor District bad ki Tnad ba kin ai ia ki song jingiarap sha ki Iing ba shah ktah bad ka kam kala sdang bad ki jingiarap bapher bapher kynthup ki CGI sheet la pynpoi mynta sha kine ki longiing kiba shah ktah” ong u Conrad.
U iathuh ba ka Sorkar kala pynkylla ruh ia ki kyndon ba shah ia ki Deputy Commissioner ba kin sam ia ki CGI sheet sha ki lanot tang ha ka kyrdan jong ki District.
“Mynshuwa haba don kum kine ki jingjia, ki kyndon kila shah tang ban sam khaw bad kiwei ki marbam ba dei ban leh kyrkieh bad kiwei kiwei ki tiar iing kim don satia ha ka thup ban sam kyrkieh hynrei ngi la pynkylla ia ki kyndon ha kine ki snem bala leit noh bad mynta ki Deputy Commissioner ha ka kyrdan lajong khlem da ap ia ki jingmyntoi na ki bor ka Sorkar Jylla, kila lah ban sam ia ki CGI sheet nalade kat kum ka jinglum jingkhein jong ki” ong u Conrad.
“Kane kala pynsuk ia ka rukom sam jingiarap mynta bad kane ka kam kaba ju shimpor haduh hynriew bnai lane wat haduh shisnem shuwa ba ngin lah sam CGI sheet, mynta ka jingpynkylla ia ka kyndon ha kine ki khyndiat snem, ki Deputy Commissioner kila lah ban leh eei mardor bad mynta kiba bun ki iing kila dep ioh ia ki tiar kynthup ki CGI sheet bad kito ki bym pat ioh, nga pynthikna ba hapoh 24-48 kynta kin sa ioh noh” ula bynrap.
