Shillong Jymmang 29: Ka Sorkar Pdeng kala bthah ia ka Sorkar Meghalaya ba kan pynkloi noh ia ki kam ki jam na ka bynta ban ker sainar ha shi lynter jong ka thain khappud bad ka ri Bangladesh hadien ba sakhi ia ka jinglong jingman ba mynta ha katei ka ri kaba marjan.
“U Myntri Rangbah ka jylla u Conrad K Sangma dang shen ula iakynduh ia u Myntri kam pohiing ka ri u Amit Shah bad ula iakren halor katei ka mat kaba iadei bad ka jingker sainar ha khappud. Ka tnad kam pohiing kala ong ia ngi, ba ngi donkam ban pynsted noh ia ki kam bad ban pynthikna ba baroh kadei ban iaid ha ka lynti jongka mishon bad ban pynkut noh ia baroh ki kam kiba iadei bad ka jingshim jaka, khnang ba ka jingker sainar kan iaid noh mardor” la ong u Chief Secretary u Bah DP Wahlang.
Ula pyntip ba kila don katto katne ki mat kiba iadei bad ka jylla. Kaba nyngkong kadei ba katto katne ki mukotduma ki dang don hapoh ka jingbishar ka iingkashari, ia kaba donkam ban pynbeit noh bad ka baar kadei ba ki don katto katne ki bynta ia kaba ka jingpynshisha bad ka jingpynskhem ka donkam ban phah noh da ki Deputy Commissioner sha ka Tnad Kam Pohiing ka Ri khnang ba kan ioh pyllait noh ia ka bhah tyngka.
“Ha kaba iadei bad ka bynta ka baar, la dep ai ia ki syrnod jingpynshisha da ki DC jong ka jylla bad ka Sorkar India ka dang khmih bniah ia ki kot ki sla bad shen yn sa pyllait noh ia ka pisa. Nga ngeit skhem ba shisien ba la dep pyllait ia ka pisa, yn sa sdang noh ia ka jingtei” ong u Bah Wahlang bad ka bynrap “Ha kaba iadei bad ki mukotduma ha iingkashari, ngi lah dep kyrpad ia ka iingkashari ban ailad ban sdang noh ia ka jingtei ban ker sainar, katba ym pat dep ban shim ia ka rai kaba khatduh namar ba kadei na ka bynta ka jingshngain kaba don bynta bha mynta”.
U Chief Secretary ula pynthikna ba 75-80 percent jong ka jingker sainar yn pyndep hapoh jong une u snem.
“Ngi don ia u pud u sam ha ka thain khappud kaba long 443 Km ha kaba ka jingker sainar kumba 60% kadei kaba la pyndep bad kaba sah ka dei sa 40% kaba hap ban pyndep hynrei da ka jingshim ia ki sienjam kiba dang shen. Ngi lah don ia ka jingialang haduh 6-7 sien ban khmih halor kane ka kam ha kaba kiba bun hi kidei kiba la lum da u Myntri Rangbah ka jylla. Ngi pynthikna ba hashwa ban kutu ne u snem kane ka jingpyndep kaba la kynjoh sha ka 60% kadei ban kiew noh sha ka 75% ne 80%.”
