Guwahati, Nailar 13: Ka Sorkar Pdeng ka la bthah ia ka Arunachal Pradesh bad ka Manipur ba kin pynsted noh ia ka jingker sainar ia ki jaka khappud ka Indo-Myanmar ban khanglad ia ki jingwan buhai shnong be-ain, ki kam lehnoh bad ka jingkhaii droks lyngba u pud u sam.
Une u pud u sam ka India-Myanmar u dei uba jrong 1,643km bad la ïasam lang da ka Arunachal (520km), ka Nagaland (215), ka Manipur (398), bad ka Mizoram (510). Mynta tang 10 km na une u pud u sam ha Manipur la ker sainar.
Ha u bnai Rymphang, u Myntri kam Pohïing ka Sorkar Pdeng, u Amit Shah, u la pynbna ïa ka jingthmu ban ker sainar noh ïa u pud u sam baroh kawei, kaba la pynlong ïa ki jingïakhih ha Mizoram bad Nagaland.
Ka MHA ka la bthah ia ki sorkar jylla ban iatreilang bad ka Assam Rifles and Border Roads Organization ban pyndep ia ki jaka bad ki jingpynbeit ia ka jingker.
Mynshem snem ka Sorkar Pdeng ka la pynsangeh noh ia ka soskular iarung iamih alaitluid (FMR) bad ka Myanmar,ia kaba la pyrshah jur da ka Mizoram bad ka Nagaland.
Ka iing dorbar jong ka Mizoram ha ka 28 tarik u Rymphang mynta u snem ka la shim ia ka rai da kawei ka sur ban pyrshah ia ka rai jong ka Sorkar Pdeng ban ker sainar ia u pud u sam ka India-Myanmar bad ban pynduh noh ia ka Free Movement Regime (FMR).
Ka sorkar Nagaland bad la jan baroh ki seng ha kane ka jylla ruh ki pyrshah ia ka jingker pud bad ban pynduh noh ia ka FMR.
Ki phetwir na Bangladesh na Chittagong Hill Tracts (CHT) ki la phet krad na la ki shnong ki thaw bad leit wad jaka rieh sha Mizoram hadien ka jinghiar thma jong ki shipai Bangladesh pyrshah ia ka kynhun lehnoh Kuki-Chin National Army (KNA).
