Shillong, Naiwieng 15: U Symbud Myntri Rangbah ka jylla u Bah Prestone Tynsong uba khmih ruh iaka tnad PWD (Roads) hynne ka sngi Baar, ula ong, ba ka sorkar jylla kala dep ban bthah iaka National Highway Authority of India (NHAI) ban maramot noh mardor iaka jngjulor haka Jingkieng Dwar Ksuid, Umroi khnang ba ki kali kin ioh ban iaid na katei ka jingkieng.
“Ngi la iatai sani ha ka Review Meeting kaba la long hynne ka sngi, ha kaba iadei bad ka Jingkieng Dwar Ksuid bad ia katei ka surok la peit da ka NHAI bad mynta ki dang pynlong iaka jingmaramot bad hadien 3 sngi yn sa shah biang ia ki kali ban iaid bad kan don pat ka jingbuh kyndon ba ki kali kin ym lah ban kit palat pud haba ki iaid na katei ka jaka. Ngi la bthah ia u Project Director ka NHAI ba udei ban don beit ha katei ka jaka bad ban pyndep kloi katba lah iaka kam” ong u Bah Prestone Tynsong.
Ula iathuh ba ka jingshna iaka jingkieng Dwar Ksuid kaba thymmai kala iaid shakhmat bad u Contractor ula pynthikna ban shna pyndep ha kine ki 4-5 bnai kiban ia katei ka jingkieng.
Haba kylli la ka sorkar ka don iaka jingthmu ban shna thymmai noh iaka jingkieng ha Damsite, u Bah Prestone ula ong “Ka NHAI kala aiti ia katei ka projek haka NHIDCL bad ngi don iaka jingthmu ban shna iaka surok Four Lane naduh na Umiam shaduh Shillong kata lada ngi ioh iaka jaka. Lada jia ba ngim ioh iaka jaka, ngin shna noh iaka surok Four Lane haka Shillong Eastern Bypass kaban mih sha ka thaiñ Mawdiangdiang ban pyniasoh biang bad ka nongbah Shillong” ong u Bah Prestone.
