Shillong, Jylliew 16 : Ka Sorkar Jylla kala bthah ia kawei pa kawei ka Tnad treikam ba kin thung ia ki Grievance Redresal Officer (GRO) ba kin khmih bad pynbeit ia kino kino ki jingeh ne jingujor kiba mih na ka jingpyntreikam ia ka Reservation Roster hapoh ka Jylla.
Ia kane la pynpaw ha ka Office Memorandum halor ka Reservation Policy-Maintenance of Reservation Policy bala pynmih da ka Tnad Personnel & Administrative Reforms (B) ha ka 14 tarik Jylliew.
Kane ka OM ba thymmai kala mih ruh hadien ba ka Kynhun Myntri kala rai dang shen ban pynkylla noh ia ki kyndon jong ka OM bala pynmih ha ka 10 tarik Jymmang, 2022.
“Baroh ki tnad Sorkar ki dei ban thung ia ki senior officer ka Tnad ha ka kyrdan Under Secretary ne palat kum ki Grievance Redressal Officer lada on kano kano ka jingeh kaba mih na ka jingpyntreikam ia ka Reservation Roster” ong ka OM.
La bynrap “Kino kino ki briew ki bym sngewiahap bad ka jingpynmih ia ka Reservation Roster ki lah ban leit ujor bad ki Grievance Redressal Officer jong ki Tnad ba dei khmih, kiba dei ban pynbeit ia kane ka kam hapoh ka arbnai naduh ka sngi ba ki ioh pdiang ia ka jingujor”.
Ka OM ka ong ba ka jingbhah ia ki kam na ka bynta ki Scheduled Tribe bad Scheduled Caste kan long kat kum ka Resolution ba pynmih ha ka 12 tarik Kyllalyngkot, 1972.
Ia ka Reservation Roster yn hap ban pyntreikam ia baroh ki jingthungkam bala shu thung beit beit (direct employment) ka ban long naduh ka kyrdan kaba rit duh.
Ka Reservation Roster kan ym treikam ia ki kam ba lait thylli iakiba la pyndap dakaba shu pynkynriah (transfer) lane jing pynkiew kyrdan (promotion), jingthungkam ba shipor (temporary) bay m duna ia ka 45 snem, kiba shu thungkam shipor kum ki work charge staff kynthup ia kiba ai bylla sngi bad bylla bnai ne ba thung contract.
Haba pynpaw ba ka Reservation Roster ka dei tang ban pynthikna ia ka jingpyntreikam ia ka Reservation Policy, ka OM ka ong ba ka Reservation Roster kam don jingkhein ia ka jingtrei shuwa ia ka kam (seniority). Ka seniority kan dang iai bteng kat kum ka Rule bala don lypa.
Hadien ba baroh ki mat jong ka Roster kala kut lut, ka Roster ba thymmai ka dei ban sdang kaban shong ha ka jingdon kam ia ki nongtrei.
Kala ong ruh ba ka Tnad Personnel & AR (B) kan dei ka bor ka ban ai jingmynjur ia ka Reservation Roster bala pyntreikam da ki baroh ki Tnad Sorkar/ki Head of Department/ District Head/ PSU ba dei ki sanction post.
Baroh ki Departments/Heads of Department/District Heads/PSU ki dei ban pynthikna noh mardor ba die ban pyndap noh ia ka Reservation Roster ha baroh ki jait kam kiba la dep pyndap ha ryngkat bad ka jingdonkam Nongtrei. I aka Reservation Roster dei ban aiti sha ka Tnad Personnel and AR (B) hadien bala dep mynjur da ki Tnad.
Ka OM ka ong ruh ba shuwa ban phah ia ki kam kiba lait na ka bynta ban pynbna laitkam da ka Meghalaya Public Service Commission (MPSC) ne District Selection Committee (DSC) lane Central Recruitment Board (CRB) lane kino kino ki bor, ki Department/Heads of Department/District Heads/PSUs ki dei ban phah ia ki Reservation Roster jong ki bad ki jingpynbna lait kam sha ka Tnad Personnel & AR (B) ba kan ai jingmynjur.
“Nangne shakhmat, baroh ki Department/District Heads/PSU ki dei ban ioh ia ka jingmynjur jong ka Tnad Personnel & AR (B) shuwa ba kin pynbna ia ka jinglait kano kano ka kam kaba dei ban pyndap da kaba shu thung beit beit” kala ong.
Kala ong ruh ba ki Department/District Heads/PSU ki dei ban buh ia ka Reservation Roster Register ha ka dur jong ka register ka ban treikam (running account) na uwei u snem sha uwei pat.
“Kum ka nuksa, lada ha kano kano ka jingthungkam,u numbor ba thungkam u kut ha u 36, ka jingthungkam ha u snem ban wan kan sdang naduh u 37. Ha manla ki jingthungkam, dei ban buh jingthoh ha ka Reservation Roster Register ba kdew ia ka jingiohkam ki Khasi bad Jaintia, Garo, kiwei ki ST bad SC” kala ong.
Ka OM kala ong ruh ba ia ki kam kiba ka jingbhah kam ia ki briew ba don jingduna dkhot met (PWD) kam treikam, ki Department/District Heads/PSU ki dei ban pyntreikam ia 100 na ka shispah ia ka Reservation Roster.
Ia ki kam bala ithuh ba ibit ia ki briew ba don jingduna dkhot met, ki dei kiba la pynbna da ka Tnad Personnel & AR lyngba ka jingpynbna paidbah bala pynmih ha ka 25 tarik Kyllalyngkot, 2012.
Ha kajuh ka por, ka OM ka ong ruh ba ha ki kam ba lait ha ki District ne Sub-Division, ka jingbhah ia ki kam kan long kat kum ka OM ba 18 tarik Nohprah, 1972, kaba kren halor ka jingkyllum lang ia ka bhah ba 80% n aka bynta ki Garo, Khasi Jaintia ha baroh ki kam ba lait.
Pule lang ia kane: Mudui ka KSU sha u Regional Manager ka MRB ba suba don jyrsieh Life Insurance
 ba kin khmih bad pynbeit ia kino kino ki jingeh ne jingujor kiba mih na ka jingpyntreikam ia ka Reservation Roster hapoh ka Jylla.){kind=link}